Tragjedia në Koçan ka dimensione të një katastrofe kombëtare dhe politika nuk ka vend në situata të tilla, tha Prokurori i Shtetit të Republikës së Maqedonisë së Veriut, Ljupço Kocevski. Sipas tij, qëllimi i përbashkët është të dënohen të gjithë ata që janë përgjegjës dhe të sigurohet që një tragjedi e tillë të mos përsëritet.
Në një intervistë për gazetën serbe “Politika”, Kocevski tha se ishte toleruar për një kohë të gjatë mosrespektimi i ligjit, dhe tani të gjithë kërkojnë drejtësi, që duhet të realizohet. Ai shtoi se provat që po mblidhen çdo ditë tregojnë se shkaku i kësaj tragedie është një erozion i përgjithshëm i sistemit, një kulturë mosrespektimi të ligjit dhe rregullave, por edhe një korrupsion i thellë sistemik.
“Prokuroria, për fat të keq, nuk është një organ parandalues, por represiv. A mund të ishte parandalur ky rezultat? Do të thosha, ndoshta. Por tani është koha për të përballuar pasojat, për të dënuar ata që janë përgjegjës për këtë katastrofë dhe për të parandaluar që një tragjedi e tillë të ndodhi përsëri”, tha Kocevski. Ai theksoi se një element i përbashkët i ngjarjeve tragjike të viteve të fundit është se përveç shkakut të drejtpërdrejtë të katastrofës, shpesh ka një faktor të dytë që ka të bëjë me mosrespektimin e ligjit dhe korrupsionin sistemik, që ndihmon në rritjen e pasojave katastrofale.
Në Shkup, edhe sot, qytetarët po ndezin qirinj për nder të viktimave të tragjedisë në klubin “Puls” në Koçan. Shumë qytetarë kanë ndezur qirinj në sheshin “Maqedonia” në nderim të të ndjerëve nga kjo tragjedi e tmerrshme.
“Por, ajo që është shumë e dhimbshme në këtë rast është se pasojat janë shkatërruese. Koçani është një qytet i vogël në lindje të vendit. Në këtë tragjedi, në vetëm një natë, humbëm pothuajse të gjithë gjeneratën e rinisë nga ky qytet të vogël dhe nga një aspekt sociologjik, do të thosha se kjo është një tragjedi kolektive që populli ynë e ka shumë të vështirë ta përballojë”, tha Kocevski, prokurori shtetëror.
Në lidhje me pyetjen nëse organet e kompetente ishin informuar për këtë ngjarje dhe nëse kishin kryer detyrën e tyre profesionale që ky ngjarje e kërkonte, Kocevski u shpreh se çdo gjë do të kontrollohet në kuadër të hetimit.
“Do të verifikohet gjithçka në kuadër të hetimit. Të gjitha ato ligje dhe rregullore ekzistonin në letër, por deri tani nuk kemi gjetur asnjë që është zbatuar. Deri tani, 28 persona janë në statusin e të dyshuarve, prej të cilëve tre janë në spital, 18 janë në paraburgim në hetim paraprak, dhe kundër shtatë punonjësve të policisë është duke u zhvilluar hetimi dhe ata gjithashtu janë në paraburgim. Provat po mblidhen në formën e dëshmive dhe dokumenteve materiale, por edhe në formë të ekspertizave dhe mendimeve profesionale nga disa fushë. Të gjitha këto prova deri tani çojnë në dyshime për veprën penale – vepra të rënda kundër sigurisë publike për shkak të rrezikimit të drejtpërdrejtë të jetës dhe trupit të personave, për të cilat është parashikuar dënim deri në 20 vjet burg. Po hetohen gjithashtu akte të dhënies dhe pranimit të ryshfetit, shkelje në blerjen e mjeteve piroteknike, si dhe disa vepra të tjera penale”, tha Kocevski.
Ai shtoi se hetimi do të jetë i shpejtë, efikas dhe gjithëpërfshirës.
“Do të mbajnë përgjegjësi edhe ata që me mosbërjen e punës dhe mosrespektimin e detyrave të shërbimit janë pjesërisht të fajshëm për katastrofën. Për një kohë të gjatë është toleruar mosrespektimi i ligjit, dhe pasoja është shkatërruese për të gjithë ne. Tani të gjithë kërkojnë drejtësi dhe drejtësia duhet të realizohet”, theksoi Kocevski.
Në këtë aksident tragjik, i ndodhur në mëngjesin e hershëm të së dielës në diskotekën “Puls” në Koçan, humbën jetën 59 persona dhe janë plagosur pothuajse 200 të tjerë.
