Shtipi, Kratova, Kriva Pallanka, Vallandova dhe Dellçeva janë ndër 21 komunat ku në garë për kryetar komune janë vetëm dy kandidatë, dhe me shumë gjasa qytetarët do të zgjedhin udhëheqësin e vetëqeverisjes lokale që në raundin e parë të zgjedhjeve lokale, respektivisht më 19 tetor. Zgjedhjet lokale do të mbahen në gjithsej 80 komuna dhe për Qytetin e Shkupit.
Në Komunën e Bogorodicës do të përballen Bllazhe Shapov, i mbështetur nga koalicioni i LSDM-së, dhe Marjan Peev nga VMRO-DPMNE. Në Bogovinë garojnë Feti Anazi nga VLEN-i dhe Besnik Emshi nga AKI; në Bosillovë – Mariçe Karmaziçeva nga LSDM dhe Risto Mançev nga VMRO-DPMNE; në Vallandovë – Pero Kostadinov nga LSDM dhe Gjoko Kamçev nga VMRO-DPMNE; në Vasillevë – Sllave Andonov nga VMRO-DPMNE dhe Vanço Novosellski nga LSDM.
Në Vrapçishtë përballen Mehmet Seferi nga VLEN dhe Isen Shabani nga BDI; në Gradsko – Kiro Nackov nga VMRO-DPMNE dhe Dragosllav Simonoviq nga LSDM; në Dellçevë – Ivan Gocevski nga VMRO-DPMNE dhe Dejan Glinxharski, i mbështetur edhe nga LSDM; në Zhelinë – Blerim Sejdiu nga VLEN dhe Emir Sulejmani nga AKI; në Zërnovcë – Vanço Mitev dhe Borço Kocev, të dy nga LSDM; në Karbincë – Viktor Paunov nga VMRO-DPMNE dhe Lubica Sokolovska nga LSDM; në Kratovë – Vllatko Spirovski nga LSDM dhe Todorçe Nikollovski nga VMRO-DPMNE; në Kriva Pallankë – Sashko Mitovski nga LSDM dhe Oliver Aleksovski nga VMRO-DPMNE.
Në Krivogashtan garojnë Igor Karaviloski nga LSDM dhe Sasho Graoroski nga VMRO-DPMNE; në Likovë – Nexhmedin Sadiki nga VLEN dhe Erkan Arifi nga AKI; në Mavrovë dhe Rostushë – Anes Ahmeti nga LSDM dhe Oner Jakupovski nga VMRO-DPMNE; në Novo Sellë – Gjorgje Bozhinov nga VMRO-DPMNE; në Petrovec – Borçe Mitovski nga VMRO-DPMNE dhe Elizabeta Zelenikovska nga LSDM; në Pllasnicë – Elsan Nurçeski nga Partia Demokratike e Turqve dhe Alia Jaoski nga AKI; në Tearcë – Nazim Taipi nga AKI dhe Daut Memishi nga VLEN; ndërsa në Shtip – Ivan Jordanov nga VMRO-DPMNE dhe Pavell Ivanov nga LSDM.
Sipas sondazheve dhe analizave matematikore, disa ekspertë dhe media vlerësojnë se në disa komuna zgjedhjet mund të përfundojnë që në raundin e parë, duke u zgjedhur kryetari i komunës pa pasur nevojë për raund të dytë. Këshilltarët e komunave zgjidhen në raundin e parë, përveç rasteve kur votimi duhet të përsëritet.
Nëse në raundin e parë asnjë kandidat nuk fiton shumicën e nevojshme të votave, sipas nenit 132, paragrafi 1 i Kodit Zgjedhor, organizohet raundi i dytë midis dy kandidatëve që kanë marrë më shumë vota. Ky raund zhvillohet brenda 14 ditëve nga përfundimi i raundit të parë, dhe fitues shpallet kandidati që merr më shumë vota.
Në rast se as pas raundit të dytë, për çfarëdo arsye, nuk zgjidhet kryetari i komunës, komisioni zgjedhor është i detyruar ta njoftojë Qeverinë brenda 15 ditëve nga përfundimi i zgjedhjeve.
Këshilltarët zgjidhen në raundin e parë sipas modelit proporcional, duke përdorur formulën D’Hondt. Sipas kësaj formule, numri i përgjithshëm i votave për listat e kandidatëve ndahet me vargun e pjestuesve 1, 2, 3… deri në numrin e anëtarëve të këshillit që do të zgjidhen. Kuotat e përfituara renditen nga më e madhja te më e vogla, derisa të plotësohet numri i vendeve në këshill. Një listë kandidatësh fiton aq vende sa kuota të mëdha ka ndër ato të marra në konsideratë.
Fushata për raundin e dytë të zgjedhjeve fillon menjëherë të hënën, më 20 tetor, dhe përfundon më 30 tetor në mesnatë. Raundi i dytë i zgjedhjeve do të mbahet më 2 nëntor.
