Gjykata e Lartë me datë 15 tetor ka vendosur të shqyrtojë kërkesën e ish-deputetit të Partisë Demokratike, Ervin Salianji, për pezullimin e vendimit të marrë nga Apeli, që e dënoi me 1 vit heqje lirie.
Çështja, e cila do kalojë në dhomë këshillimi, do të shqyrtohet në orën 13:00.
Relator për çështjen është caktuar Sokol Binaj sipas shortit të hedhur.
Kujtojmë se me datë 26 shtator, Gjykata e Apelit e dënoi Ervin Salianjin me 1 vit burg.
Një ditë më pas, demokrati u vetëdorëzua në Policinë e Tiranës pas dhënies së vendimit nga togat e zeza dhe u dërgua në burgun e Fierit ku do të vuajë dënimin.
Sakaq, katër ditë pas dënimit me burg, ish-deputeti kërkoi pezullimin e vendimit të Apelit.
“Në lidhje me cilësinë aktuale të deputetit, do i referohemi faktit që ende nuk ka një vendimmarrje të Komisionerit Shtetëror të Zgjedhjeve në zbatim të nenit 164 të K.Zgjedhor1, çka do të thotë që pezullimi i ekzekutimit është i rëndësishëm përveçse për vuajtjen e dënimit me burgim, por edhe për ruajtjen e mandatit të deputetit si një mandat që i takon popullit. Duke qenë se kërkuesi Ervin Salianji është zgjedhur deputet nga populli me mbi 10 mijë vota preferenciale në zgjedhjet e vitit 2021, zgjedhje këto të zhvilluara pas vendimit të Gjykatës së Rrethit Gjyqësor Tiranë (18.12.2019), vendim ky i lënë në fuqi me vendimin e Gjykatës së Apelit të Juridiksionit të Përgjithshëm, është tregues i shkakut të veçantë që paraqet ky rast në kuptim të nenit 476 pika 1 të K.Pr.Penale. Besimi me votë që i ka dhënë populli, pavarësisht një vendimmarrje gjykate të dhënë më parë, është tregues i veçantisë që ka rasti objekt shqyrtimi, për më tepër që sovraniteti në Republikën e Shqipërisë i përket popullit”, thuhet ne shkresen drejtuar Gjykates se Larte.
Ish-deputeti i PD që e cilëson dënimin të padrejtë dhe pa prova, ndaj kërkon pezullimin e vendimit, duke pretenduar se nuk i janë vënë në dispozicion aktet e dosjes dhe vendimit të Apelit, para se të burgosej.
Sipas tij Prokuroria dhe Gjykata kanë nxituar në ekzekutimin e vendimit, duke theksuar se duhet të pritej një herë zbardhja e vendimit apo rekursi në Gjykatën e Lartë.
Kujtojmë që ditën e djeshme (30 shtator) Parlamenti u njoftua për dënimin e formës së prerë nga Apeli i Tiranës, gjë që çoi edhe në humbjen e mandatit përfundimtar të deputetit.
The post Kërkoi pezullimin e vendimit të Apelit, Gjykata e Lartë cakton datën 15 tetor për shqyrtim të kërkesës së Salianjit! Çështja do kalojë në dhomë këshillimi appeared first on Gazeta Shqiptare Online.
