Përplasja mes qeverisë shqiptare dhe biznesmenit Behgjet Pacolli për Aeroportin Ndërkombëtar të Vlorës po shkon drejt një beteje të mundshme ligjore ndërkombëtare.
Pas nisjes së procedurave nga Ministria e Infrastrukturës dhe Energjisë për zgjidhjen e kontratës koncesionare, kompania Mabco Constructions ka paralajmëruar se mund t’i drejtohet arbitrazhit për të mbrojtur të drejtat e saj.
Biznesmeni Behgjet Pacolli, përmes disa reagimeve publike, ka deklaruar se kompania ka kërkuar për më shumë se një vit dialog me autoritetet shqiptare për të shmangur një përballje ligjore.
Sipas tij, Mabco është përballur me pengesa të vazhdueshme, përfshirë kufizimin e aksesit në kantier, përjashtimin nga administrimi i projektit dhe vendime që, sipas kompanisë, kanë cenuar të drejtat kontraktore të investitorit.
Pacolli pretendon se kompania ka investuar mbi 320 milionë euro në Aeroportin e Vlorës dhe se deri në muajin maj projekti ishte pranë përmbushjes së detyrimeve kryesore kontraktore dhe fazës së certifikimit të aeroportit.
“Askush nuk mund të mbahet përgjegjës për pasojat e krijuara nga pengesat që nuk varen prej tij”, ka deklaruar Pacolli, duke paralajmëruar se kompania do të përdorë të gjitha mjetet ligjore në dispozicion, brenda dhe jashtë vendit.
Në reagimin e tij të fundit, biznesmeni shqiptaro-zviceran është shprehur se çështja tashmë nuk lidhet me deklarata apo emocione, por me kontrata, dokumente dhe prova.
“Koha e emocioneve ka kaluar”, ka deklaruar Pacolli, duke theksuar se mbrojtja e të drejtave të kompanisë do të bëhet përmes mekanizmave ligjorë.
Ndërkohë, mosmarrëveshja për Aeroportin e Vlorës ka ngritur diskutime edhe për klimën e investimeve në Shqipëri. Projekti ishte prezantuar nga qeveria si një investim strategjik për zhvillimin e turizmit dhe ekonomisë në jug të vendit.
Nëse çështja kalon në arbitrazh ndërkombëtar, përballja mund të ketë pasoja financiare dhe të ndikojë në perceptimin e investitorëve të huaj për sigurinë juridike dhe stabilitetin e marrëdhënieve kontraktore në Shqipëri.
