Inspektorati shtetëror i tregut tre javë pa drejtor. Qeveria edhe në seancën e djeshme nuk e emëroi zëvendësin e Stojko Paunovskit, i cili u shkarkua pas reagimeve në opinion. Që të përzgjidhet drejtori i ri i Inspektoratit, leje duhet të japë personalisht kryeministri Zaev.
– Advertisements –
“Do të emërohet kur qeveria do të vendosë, besoj do të kthehet kryeministri nga turneu evropian dhe do të zgjidhet drejtori në njërën nga seancat e ardhshme qeveritare- deklaroi Lupço Nikollovski- zv- kryeministër i resurseve njerëzore.
Vetëm një javë më parë, i pyetur nga Alsat, Nikollovski tha se priste që drejtori të emërohej në seancën e qeverisë të mbajtur dje, por kjo nuk ndodhi. Ndërsa qeveria po zvarrit se kush do ta drejtojë inspektoratin e tregut, punonjësit e këtij institucioni nuk janë paguar për muajin prill. Edhe pse në inspektoratin e tregut paga e punonjësve paguhet nga 1 deri në datën 5 çdo muaj, këtë herë kjo nuk ndodhi sepse me shkarkimin e Paunovskit, nuk ka kush t’i nënshkruajë urdhërpagesat. Përkundër kësaj, inspektorët e tregut dalin në terren për të kontrolluar nëse subjektet afariste i respektojnë protokollet për mbrojtje nga kovid 19.
Kjo situatë në inspektoratin e tregut vjen pasi Qeveria shkarkoi Paunovskin, i cili e kundërshtoi publikisht punësimin e 35 administratorëve kornizë në inspektorat të cilët u rishpërndanë nga Ministria e Sistemit Politik dhe Marrëdhënieve mes Komuniteteve.
Igor Stefanovski
