Një ngjare e rëndë trondit Romën mëngjesin e sotëm, pasi 22-vjeçarja shqiptare, Ilaria Sula, e cila ishte shpallur e zhdukur që prej 25 marsit të këtij viti, u gjet e vrarë nga i dashuri i saj Mark Antony Samson, brenda një valixheje të hedhur në një greminë.
Babai i Iliarias, Flamur Sula, ka treguar për mediat italiane se telefonatën e fundit më të bijën e ka pasur të martën e 25 marsit, ditën kur ajo u zhduk, ku dhe e bija i kishte thënë se do ktheje në shtëpi pas disa ditësh.
Flamur Sula ka treguar se pas kësaj telefonate, e bija nuk e kishte telefonuar si gjithmonë, por bisedën e kishin zhvilluar me mesazhe, dhe kjo kishte ngritur dyshime tek ta se diçka nuk shkonte, pavarësisht se Iliaria u kishte shkruar se ishte mirë.
“Hera e fundit që folëm me Ilarian ishte e martë dhe na tha se do të kthehej në shtëpi të shtunën. Ajo jeton me shoqet e saj në Romë, ku ndjek universitetin. Ajo ishte telefonata e fundit, pastaj morëm disa mesazhe nga celulari i saj që shkruante: ‘Përshëndetje, babi, mos u shqetëso. Jam mirë. Kam dalë me një djalë dhe një vajzë. Do të kthehem në Terni pas një muaji.’ Pastaj më përsëriste: ‘Mos u shqetëso, jam mirë.’ Kjo gjë na shqetësoi, sepse po të ishte vërtet vajza që po shkruante, do të më telefononte”, tregon ai.
Babai i 22-vjeçares ka rrëfyer më tej se kanë bërë denoncim për zhdukjen e saj të shtunën e 29 marsit dhe një ditë më pas janë takuar dhe me të dashurin e saj në komisariat, i cili siç tregon Flamur Sula, i riu ishte shprehur i pikëlluar për zhdukjen e saj, madje dhe e kishte përqafuar.
“Të shtunën shkuam për të bërë denoncimin për humbjen e saj. Më pas, të dielën, takuam në komisariat të dashurin e vajzës time, nuk e dinim që ata ishin ndarë. Ai na tha se ishte shumë i pikëlluar dhe ishte i shqetësuar për humbjen e saj. Dukej i qetë dhe më dha edhe një përqafim”, rrëfen Flamur Sula, babai i Ilarias.
Mediat italiane shkruajnë se sipas burimeve mjeko-ligjore, ajo vdiq të paktën 48 orë para se të gjendej, ndërsa pritet që në vijim të caktohet edhe ekipi mjeko-ligjor që do të bëjë autopsinë.
Samson, ish i dashuri me origjinë filipinase i Ilarias ka pranuar krimin makabër para policisë dhe ka qenë vetë ai që i ka treguar atyre vendin ku kishte fshehur valixhen me trupin e pajetë të studentes shqiptare.
Ai ka thënë para oficerëve të policisë se vrau me thikë Ilaria Sulën, më pas e futi në një valixhe dhe e hodhi në pyll. Pas vrasjes ai mori telefonin e studentes shqiptare, përmes të cilit postonte në rrjete sociale.
Autorin e tradhtoi telefoni
Tabulatet dhe qelizat telefonike që tregojnë vendndodhjen e një personi kur bën një telefonatë, ishin në mesin e elementëve që zunë në kurth ish të dashurin e studentes.
Përmes analizimit të tyre, hetuesit arritën të zbulonin se në ditët pas zhdukjes së vajzës, 23-vjeçari filipinas kishte vazhduar të përdorte telefonin e saj dhe bënte postime nga profilet e Ilarias në mediat sociale.
Ilaria emigroi nga Shqipëria në Terni kur ishte fëmijë së bashku prindërit e saj të cilët nisën një jetë të re në provincën Umbrian.
Nëna e saj punon si pastruese ndërsa i ati në një kompani ndërtimi. Familja jeton në një pallat pranë stadiumit Liberati.
Para se të shkonte të jetonte në Romë, Ilaria ndoqi me sukses shkollën e mesme Angeloni, në degën Ekonomi dhe shkenca sociale.
Sapo u diplomua, vendosi të regjistrohej në Universitetin “La Sapienza” për të vazhduar studimet në Fakultetin e Shkencave Statistikore.
