Shkëlzen Berisha, djali i ish-kryeministrit Berisha, është paraqitur sërish sot në Komisionin Hetimor të CEZ-it për të dëshmuar rreth çështjes së privatizimit. Por edhe këtë herë procesi ka qenë i tensionuar mes anëtarëve të opozitës dhe mazhorancës. Deputeti i PD, Arben Ristani i kërkoi dorëheqjen Ballës sepse është në konflikt interesi me Shkëlzen Berishën.
“Ju kemi bërë me dije që është një konflikt i pastër interesi mes jush dhe dëshmitarit. Ligji e ndalon një gjë të tillë. Ky komision nuk merr të pandehur. Ke një vendim gjyqësor të marrë kundër teje si kryetar komision, jeni dënuar për shpifje ndaj dëshmitarit, i keni borxh dëshmitarit, jeni në kushte kur nuk i keni paguar paratë dhe po përdorni këtë komision për tu hakmarrë.
Jeni në konflikt të pastër interesi dhe nuk pranoni të hiqni dorë nga drejtimi i këtij komisioni. Që ta marrim dëshminë duhet të jepni dorëheqje”, tha Ristani. Pavarësisht kërkesës, deputeti Balla nuk pranoi që të heqë dorë nga drejtimi i Komisionit. Ndërkohë, një javë më parë komisioni dyshoi pasi Shkëlzen Berisha refuzoi të betohet.
6 shkurt 2017 (gazeta-Shqip.com)
