Punimet për ndërtimin e linjës hekurudhore me shpejtësi të lartë të Korridorit 10 pritet të fillojnë vitin e ardhshëm. Hekurudha me shpejtësi të lartë është në procesin e përgatitjes së dokumenteve të nevojshme, siç janë një studim fizibiliteti, një studim vlerësimi mjedisor dhe të tjera.
Kryeministri Hristija Mickoski njoftoi se zbatimi nuk do të ndodhë deri në tetor, nëntor të vitit të ardhshëm, dhe tani po përgatiten studimet e nevojshme. “Në këtë moment, gjërat po shkojnë në drejtimin që duhet të shkojnë, siç e kemi planifikuar. Ministria e Transportit po kryen një studim fizibiliteti dhe një studim vlerësimi mjedisor. Është një proces që zgjat 270 ditë. Duhet të përfundojë diku në maj ose qershor. Pastaj do të hyjmë në një dialog konkurrues për të zgjedhur një kontraktues për projektin dhe presim që tetor-nëntor vjeshtën e ardhshme, të fillojmë zbatimin e këtij projekti”, tha kryeministri Hristijan Mickoski.
Planifikohet që punimet ndërtimore për hekurudhën me shpejtësi të lartë në Korridorin 10 të fillojnë vitin e ardhshëm, dhe të përfundojnë e të vihen në funksion brenda pesë deri në gjashtë vjetësh, së bashku me Stacionin Hekurudhor të Shkupit të rindërtuar dhe degën hekurudhore nga ky stacion deri në Aeroportin Ndërkombëtar të Shkupit. Paralelisht, Ndërmarrja e Hekurudhës Transporti do të duhet të sigurojë trena dhe lokomotiva të reja. “Si kornizë kohore, qëllimi është që kur të lëshohet në përdorim Stacioni Hekurudhor i rindërtuar plotësisht, trafiku nga ky stacion deri në Aeroportin e Shkupit të fillojë në të njëjtën kohë së bashku me hekurudhën e shpejtë në Korridorin 10 nga Serbia në Greqi. Është mirë që këto tre gjëra të bëhen në të njëjtën kohë”, tha Sinisha Ivanovski, drejtor i Ndërmarrjes së Hekurudhës – Infrastruktura.
Siç shpjegoi ai, projekti për rindërtimin e Stacionit Hekurudhor do të zhvillohet për të paktën një vit, i ndjekur nga aktivitetet për sigurimin e financimit dhe punimet e ndërtimit, që do të thotë se pritet të përfundojë brenda pesë deri në gjashtë vjetësh.
Nëse e përfundojmë projektin për një vit, një vit e gjysmë, atëherë financimi do të jetë ose nga buxheti i shtetit, ose me një kredi nga huadhënësit klasikë, siç janë BERZH, BEI apo Banka Evropiane Investues, bankat komerciale, por nuk përjashtohet mundësia e hyrjes në një partneritet strategjik me Britaninë e Madhe, me të cilën do të bëjmë shumë projekte kapitale të infrastrukturës.
Autoritetet thonë se Hekurudha e shpejtësisë së lartë në Korridorin 10 do të jetë me binarë të dyfishtë, ndërsa do të ruhet rruga ekzistuese. Me fjalë tjera, pjesa më e madhe e rrugës ekzistuese do të mbahet, dhe studimet që po kryhen aktualisht do të tregojnë saktësisht se ku do të vendoset rruga e re, e cila do të bëhet sa më afër dhe paralel me rrugën ekzistuese.
Ministria e Financave dërgoi një letër disa muaj më parë duke u kërkuar disa institucioneve financiare ndërkombëtare dhe bankave të siguronin para për hekurudhën.
Marrëveshja e Partneritetit Strategjik me Mbretërinë e Bashkuar i kushton rëndësi serioze investimeve në infrastrukturë, duke theksuar investimet në infrastrukturën hekurudhore, veçanërisht hekurudhën me shpejtësi të lartë në Korridorin 10 nga Tabanoca në Gjevgjeli, e cila do ta konsolidojë vendin si rrugën më të mirë, më të shpejtë dhe më efektive nga ana e kostos për trafikun hekurudhor të mallrave nga portet greke në destinacionet evropiane.
Pra, traseja ekzistuese do të rikonstruktohet plotësisht duke rritur shpejtësinë në më shumë se 160 kilometra në orë për trafikun e pasagjerëve dhe deri në 120 kilometra në orë për trafikun e mallrave. Paralelisht me atë ekzistuese, do të ndërtohet një linjë hekurudhore krejtësisht e re me dy binarë, me anë të së cilës kthesat do të drejtohen sa më shumë që të jetë e mundur dhe gjatësia e linjës hekurudhore do të zvogëlohet. Pritet një rindërtim i plotë i pjesës së hekurudhës nga Draçeva në Ilinden, si dhe pjesës nga Zelenikova në Shkup, e cila do të jetë pjesë e trenit të qytetit.
Korridori 10 shtrihet përgjatë lumit Vardar në një gjatësi prej rreth 230 kilometrash. Hekurudha aktuale është me një binar, duke transportuar si trafik mallrash ashtu edhe pasagjerësh. Ajo u vu në funksion në vitin 1873 dhe ka pësuar ndryshime, përmirësime dhe riparime. /Koha/
