Në Gjykatën Penale tashmë disa orë zgjat marrja në pyetje e deputetëve Johan Tarçullovski, Zhaklina Peshevska, Kërsto Mukoski, Sasha Vasilevski, Luben Arnaudov dhe Ljupço Dimovski para gjykatësit në procedurë paraprake për dhunën në Kuvend më 27 prill të këtij viti.
Deputetët veç e veç erdhën në Gjykatë, ndërsa një deklaratë të shkurtër për mediat para hyrjes në gjykatë dha vetëm deputeti Mukovski, i cili tha se shikuar juridikisht sipas tij nuk ka argumente për paraburgim, por, siç theksoi, ia lë gjyqit që të vendosë për atë dhe beson në të.
Gjashtë deputetët para gjykatës i pritën edhe disa kolegë të tyre nga grupi i deputetëve të VMRO-DPMNE-së që t’u shprehin mbështetje.
Gjashtë deputetët janë pjesë e 36 personave të cilët Prokuroria Themelore Publike i përndjek për “rrezikim terrorist të rendit kushtetues dhe të sigurisë” lidhur me ngjarjet e 27 prillit të këtij viti në Kuvendin e Republikës së Maqedonisë.
Të premten, Kuvendi i Republikës së Maqedonisë ua hoqi imunitetin, ndërsa njoftimi në Gjykatën Penale nga Parlamenti arriti dje, ku iu dorëzua gjykatësve kompetentë në procedurë paraprake, me çka u krijuan kushte që të veprohet rreth propozimit të prokurorisë.
