Kryetari i komunës së Çairit, Visar Ganiu, së bashku me pothuajse të gjithë ministrat e BDI-së, përfshirë këtu edhe kryeministrin, sot kanë qenë në promovimin e tregut të rikonstruuar të “Bit Pazarit”. Në fillim të fjalimit të tij, Ganiu ka thënë se, ata “atë që e premtojnë edhe e realizojnë”. Por, në fakt, Ganiu dhe ekipi i tij nuk kanë asnjë gisht në këtë investim privat. E, këtë e dinë edhe vet Ganiu. Gjatë fjalimit të tij ai gjen kohën dhe e përmend faktin se ‘investitor në Bit Pazar është SH.A. “Skopski Pazar’ e cila ka ndarë 250 milionë denarë për të realizuar punimet. Investitori real, SH.A. “Skopski Pazar”, gjatë prezantimit sot, ka premtuar se çmimet e tezgave dhe lokaleve mbeten të njëjta si para renovimit.
