Fundjava e kaluar në vend u shënua nga një seri ngjarjesh tragjike në të cilat katër persona humbën jetën. Buletinet policore regjistruan dy raste të personave të gjetur të vdekur në Shkup dhe Shtip, si dhe dy aksidente trafiku me pasoja fatale në zonën e Gostivarit dhe Resnjës.
Në të gjitha rastet është kryer vëzhgim nga ekipe policore dhe prokurorë publikë kompetentë, përcjell Pa Censurë.
Persona të gjetur të vdekur në Shkup dhe Shtip
Karposh, Shkup: Mbrëmë në orën 20:30, në SVR Shkup është raportuar se në një banesë në zonën e Karposhit është gjetur e vdekur E.D. (45) nga Shkupi. Mjeku i Ndihmës së Shpejtë Mjekësore konstatoi vdekjen, ndërsa sipas udhëzimit të prokurorit publik, trupi u dorëzua për autopsia.
Shtip: Gjatë fundjavës, në SVR Shtip është raportuar se në shtëpinë e tij është gjetur i vdekur A.P. (38) nga Shtipi. Mjeku konstatoi vdekjen pa gjurmë të dukshme dhune, ndërsa me urdhër të prokurorit publik edhe ky trup u dorëzua për autopsia.
Dy aksidente me pasoja fatale
Magjistrale Gostivar – Kërçovë (8 gusht, ora 17:10): Ndodhi një aksident i rëndë trafiku mes automjetit “Peugeot” me targa të Gostivarit, i drejtuar nga N.S. (34) nga fshati Mavrovë, dhe “Opel Astra” me targa të Shkupit, i drejtuar nga Gj.P. (63) nga Shkupi. Shoferi i Opelit, Gj.P. (63), vdiq në vendin e aksidentit nga lëndimet e pësuara, ndërsa shoferi i Peugeot-it, N.S. (34), me lëndime të rënda trupore u dërgua urgjentisht në Qendrën e Urgjencës në Gostivar.
Fshati Brajçino, Resnjë (8 gusht, ora 05:45): Në hyrje të fshatit Brajçino, motociklisti V.T. (44) nga fshati Ljubojno humbi kontrollin e motocikletës me targa të Resnjës dhe doli nga rruga. Nga lëndimet e pësuara, ai vdiq në vendin e ngjarjes.
