Fondi Shëndetësor për punonjësin që jepte informacion për “kredi të shpejta”: Rast i izoluar, qytetarët duhet të na besojnë

FSSH-ja njoftoi se mbështet plotësisht punën e institucioneve kompetente dhe se i ka ofruar të gjitha informatat e nevojshme për zhvillimin e hetimeve lidhur me njoftimin e Prokurorisë Publike të Shtetit për nisjen e hetimeve për mashtrim me të ashtuquajturit “kredi të shpejta” dhe për fillimin e procedimit penal ndaj një zyrtari në Fondin e Sigurimeve Shëndetësore.

“Veprat penale që janë objekt i procedurës “Falsifikimi i dokumentit” (neni 378), “Keqpërdorimi i të dhënave personale” (neni 149) dhe “mashtrimi kompjuterik” (neni 251-b) i Kodit Penal, janë shkelje të rënda të ligjit dhe përbëjnë kërcënim për besimin tek institucionet publike. Fondi i Sigurimeve Shëndetësore shpreh angazhimin e tij të vendosur për zero tolerancë ndaj çdo forme të sjelljes kriminale, përfshirë edhe brenda radhëve të veta”, thuhet në njoftim.