Prej katër ditësh sistemi informatik i Fondit të Sigurimit Pensional dhe Invalidor të Maqedonisë së Veriut raportohet se është jashtë funksionit, duke lënë qytetarët pa mundësi për të kryer një sërë shërbimesh.
Në redaksinë tonë kanë mbërritur ankesa nga qytetarë të cilët thonë se janë drejtuar në Fond për të marrë dokumente dhe për të kryer procedura, por janë kthyer pa shërbim. Sipas tyre, problemi vazhdon edhe sot dhe nuk ka një afat të qartë se kur sistemi do të rikthehet në funksion.
Mes shërbimeve që aktualisht raportohet se nuk mund të kryhen janë marrja e vërtetimeve për stazhin e punës, aplikimi për pension, marrja e vendimeve për pension, si dhe procedura të tjera që varen nga sistemi elektronik i Fondit.
Qytetarët që presin vendim për pension nuk mund ta marrin atë, ndërsa ata që duan të aplikojnë për pension nuk mund ta dorëzojnë kërkesën. Probleme raportohet se kanë edhe pensionistët që kërkojnë informacione lidhur me pagesat apo ndryshimet në pensionet e tyre.
Sipas informacioneve të siguruara nga qytetarët, nuk po mund të realizohen as procedura lidhur me ndihmën e njëhershme prej 40.000 denarësh, ndërsa pretendohet se janë penguar edhe pagesa të tjera që realizohen përmes Fondit, shkruajnë mediat.
Një tjetër problem është pamundësia për të marrë dokumente bazë. Qytetarët që kërkojnë listë apo vërtetim të stazhit thonë se aktualisht nuk mund ta marrin atë, ndërsa personat që kanë nevojë për dokumentacion për procedura pensionale detyrohen të presin.
Dyshime për sulm kibernetik
Në mesin e qytetarëve qarkullojnë edhe pretendime se mosfunksionimi i sistemit mund të jetë pasojë e një sulmi kibernetik. Ky informacion, megjithatë, deri tani nuk është konfirmuar zyrtarisht nga Fondi.
Situata ngre një sërë pikëpyetjesh për sigurinë dhe funksionimin e sistemit informatik të institucionit: A është Fondi përballur me një sulm kibernetik? Çfarë ka shkaktuar ndërprerjen e sistemit? A janë të sigurta të dhënat e qytetarëve dhe kur pritet rikthimi i plotë i shërbimeve?
Bëhet fjalë për një institucion përmes të cilit realizohen shërbime dhe procedura të rëndësishme për pensionistët dhe qytetarët që janë në proces të pensionimit. Për këtë arsye, katër ditë pa sistem nënkuptojnë se një numër i madh procedurash mbeten pezull.
Qytetari shkon në sportel, por kthehet pa shërbim. Kjo është ankesa që po përsëritet nga qytetarët që këto ditë janë drejtuar në Fond.
Redaksia jonë i drejton pyetjet Fondit të Sigurimit Pensional dhe Invalidor dhe drejtorit Nikolla Memov:
A është sistemi jashtë funksionit prej katër ditësh? Cili është shkaku i ndërprerjes? A ka pasur sulm kibernetik? Sa shërbime janë aktualisht të bllokuara? A janë prekur të dhënat e qytetarëve dhe kur pritet normalizimi i punës?
Deri në publikimin e një qëndrimi zyrtar, pretendimi për sulm kibernetik mbetet i pakonfirmuar. Ajo që konfirmohet përmes ankesave të qytetarëve është se shërbime të rëndësishme të Fondit nuk po mund të kryhen për shkak të mosfunksionimit të sistemit.
