Dezinformimi është problem i madh edhe në Kosovë dhe po punohet intensivisht nëpërmjet fushatave që të parandalohet përhapja e lajmeve të rreme, thotë Fitim Gashi, gazetar dhe analist nga Kosova, i cili mori pjesë në konferencën “Metamorfozis” të mbajtur javën e kaluar në Shkup. Në një bisedë për CIVIL Media, me temën e luftimit të dezinformatave dhe propagandës, Gashi ka shpjeguar situatën me rrezikun e lajmeve të rreme në Kosovë.
“Ashtu si në vendet e tjera të Ballkanit Perëndimor, keqinformimi është problem i madh edhe në Kosovë. Ne përpiqemi të luftojmë dezinformimin përmes fushatave që do të ndikojnë dhe krijojnë narrativa reale. Situata u përkeqësua veçanërisht pas agresionit të Rusisë kundër Ukrainës, me propagandën që vinte nga Vladimir Putin dhe Sergej Lavrov. Për shembull, përmes mediave të tyre përhapin lajme të rreme se ushtarët nga Kosova po luftojnë në Ukrainë dhe këtë e publikuan për të krijuar një klimë që u përshtatet atyre. Pra, konferencat dezinformuese janë një nga mënyrat për të shkëmbyer përvoja – për të luftuar propagandën”, thotë Gashi.
Sipas Gashit, njerëzit gjithnjë e më shumë i njohin lajmet e rreme dhe nuk u besojnë portaleve që nuk kanë gjurmë dhe janë me editorial të dyshimtë.
“Njerëzit tashmë janë mësuar të njohin mediat profesionale dhe nuk u besojnë portaleve që janë pa gjurmë. Këto portale krijojnë lajme të rreme, disa për lexueshmëri dhe klikime, ndërsa disa të tjera për të krijuar axhenda për t’i realizuar. Ajo që arrijmë të bëjmë me partnerët tanë nga “Metamorfozis” dhe pjesa tjetër e Ballkanit Perëndimor është të luftojmë dezinformimin. Ne bëjmë edhe analiza që i nxjerrim në opinion për të kuptuar pasqyrën reale të informacionit real në Kosovë”, thotë Gashi.
Anna Vasilevska
