Kryetari i Lidhjes Socialdemokrate të Maqedonisë, Venko Filipçe, në një intervistë për Slloboden Peçat, tregoi se ndoshta një nga arsyet pse qeveria kundërshton deklasifikimin e dokumentacionit që lidhet me rastin në Agjencinë e Sigurisë Nacionale është frika nga dalja në dritë e informacionit në lidhje me burime të dyshimta financiare të huaja që lidhen me VMRO-DPMNE, transmeton Portalb.mk.
“Kishte burime të dyshimta të kredisë hungareze, pavarësisht nëse ishin para kineze apo ruse, askush nuk e di. E shihni se çfarë është aleanca midis Rusisë dhe Kinës në nivel global. Disa nga informacionet në lidhje me financat që erdhën gjatë qeverisjes sonë në disa struktura, gjithashtu. Ndoshta kjo është një nga temat që do të dalin nëse këto të dhëna deklasifikohen tani nga ASN. Nuk mendoj se qeveria do ta bëjë këtë, sepse mendoj se do ta shmangë atë temë”, tha Filipçe.
Në intervistë, Filipçe bëri përsëri thirrje për deklasifikimin e dokumentacionit, duke thënë se kjo është e vetmja mënyrë për të sqaruar çështjen, pa pasur nevojë për vendime gjyqësore.
“Ligji përcakton qartë se vetë institucioni, pra ASN, është përgjegjës për deklasifikimin e dokumenteve nëse ka dyshime për krim ose abuzim. Pra, varet nga Agjencia e Sigurisë Nacionale dhe drejtori nëse këto materiale do të deklasifikohen apo jo. Ne kërkojmë që ato të deklasifikohen, për të parë se cilët persona u dërguan, cilat grupe dhe pse, për të parë nëse ka pasur shkelje nga dikush, nëse dikush duhet të mbajë përgjegjësi”, tha Filipçe.
Siç tha Filipce, ekziston një pyetje specifike, dhe kjo është nëse kryeministri komunikoi me ato grupe që u dërguan dhe materialet u përpunuan në përputhje me kapacitetin dhe kompetencat e Agjencisë së Sigurisë Nacionale, dhe pse ai komunikoi.
“A u dërgua ai drejtpërdrejt apo komunikoi me dikë që u dërgua për shkak të aktiviteteve të dyshimta? Dhe kjo është një pyetje e jashtëzakonshme. Apeloj që këto dokumente të deklasifikohen sa më shpejt të jetë e mundur dhe publiku të dijë se për çfarë bëhet fjalë”, tha kryetari i LSDM-së, Venko Filipçe.
Nndryshe, në lidhje me përgjimet e mundshme që janë realizuar nga Agjencia për Siguri Nacionale (ASN), Prokuroria Themelore Publike për Ndjekjen e Krimit të Organizuar dhe Korrupsionit sqaroi që është duke vepruar në përputhje me përgjegjësitë ligjore.
“Për shkak të interesit të shtuar publik në lidhje me abuzimin e mundshëm të pushtetit nga anëtarët e shërbimeve të sigurisë dhe përgjimin e paligjshëm të komunikimeve, PTHP NKOK informon publikun se po vepron në përputhje me kompetencat e saj ligjore dhe parimin e garantuar kushtetues të ligjshmërisë dhe barazisë para ligjit”, njoftoi Prokuroria.
