Prindërit dhe fëmijët me nevoja të veçanta përmes nismës “5 në 12” sërish i ngritën tendat përpara Kuvendit. Anëtarët e saj kërkojnë që pagesa e veçantë që marrin ata të mos kufizohet deri në moshën 26 vjeçe por të mbetet deri në fund të jetës së tyre. Gjithashtu, prindërit kërkojnë hapjen e qendrave shtesë ditore për përkujdesjen e tyre.
“Me hapjen e qendrave ditore për përkujdesje do të zgjidhet problemi më i madh për prindërit sepse ne të gjithë jemi të aftë të punojmë por nuk mundemi sepse nuk kemi ku ti lëmë fëmijët”, tha Suzana Stojanovska, “5 në 12”.
“Është koha e fundit që këta 120 deputetë, ministra e biznesmen, të gjithë sektorët të vijnë këtu dhe t’i ndajmë problemet bashkë, të mos mbeten vetëm në letër. Ejani këtu dhe na shikoni se kush jemi dhe çka jemi”, u shpreh Suaret Alisha, “5 në 12”.
Gjatë ditës, përfaqësuesit e nismës “5 në 12” realizuan takime me ministren e Punës dhe Politikës Sociale Mila Carovska. Kjo e fundit premtoi se do të krijoj një regjistër të veçantë që do të ketë qaje në të gjitha institucionet dhe do të jap numrin e saktë të këtij grupi të personave.
Është shqetësues numri i personave të cilët nuk marrin asgjë dhe janë jashtë sistemit. Maqedonisë i duhet edhe ky numër sepse kur krijoni politikë është korrekte të njëjtën ta krijoni për të gjithë dhe të gjithë të kenë qasje, sepse ka akoma prindër që fshehin fëmijët e tyre, ne akoma jemi shoqëri e mbyllur. Dëshirojmë ta rrisim ndërgjegjen publike se është shumë e rëndësishme të gjithë personat të marrin mbrojtje nga shteti – deklaroi Mila Carovska, ministre e Punës dhe Politikës Sociale.
Nisma “5 në 12” kërkoi nga udhëheqësit e Ministrisë së Shëndetësisë dhe të Arsimit t’i vizitojnë dhe të njihen nga afër me problemet me të cilat ballafaqohen personat me nevoja të veçanta.
Melihate Rustemi
