12.05.2017
Pak ditë më parë kryetari i Odës Ekonomike të Maqedonisë Veri-Perëndimore, Nebi Hoxha, pat deklaruara për mediat se kriza në të cilën gjendet vendi po i dëmton bizneset dhe i rrezikon edhe investimet e huaja.
Në ndërkohë, ish ministri i financave, Xhevdet Hajredini, pohon se në gjendjen që është vendi, as borxh më nuk i japin. Sipas tij, qeveria e cila pritet të formohet, do të përballet me probleme serioze, madje edhe më serioze se sa që dihen.
Të njëjta janë edhe vlerësimet e Profesori Besnik Fetahut i cili nënvizon se kriza politike, ka shkaktuar një krize ekonomike që nuk kapërcehet lehtë. Profesori Fetahu thotë se gjithçka funksionon në mënyrë zinxhirore: politika jo e qëndrueshme sjell rënie ekonomike,ulje të të hyrave, çka rrjedhimisht çon drejt marrjes së borxheve të reja, që shteti mund t’i sigurojë nga bankat e vendit. Sipas tij, ajo që mund tëbëjë qeveria e ardhshme, është stabilizimi politik, sepse prej aty rrjedhin të gjitha ngërçet.
Sipas ekspertëve ekonomik, 6 muajt e parë pas formimit të qeverisë do të jenë më të vështirët. Ekspertët vlerësojnë se është e vështirë ta kthejë besimin për sigurinë e investimeve të huaja një vend ku huliganët mundë të hyjnë edhe në parlament e t’i rrahin të zgjedhurit e popullit, njohton Almakos.
“Nuk pritet që investitorët e huaj të ndiejnë siguri në një vend ku një as liderët e atij vendi s’janë të sigurtë”, shton për Almakos, Profesor Fetahu.
Maqedonia edhe deri më tani jo se ka mundur të lëvdohet sa u përket investimeve të huaja. Kriza e stërzgjatur politike vetëm sa i largoi investitorët e huaj nga vendi.
Në ndërkohë, sipas disa informacioneve të pa konfirmuara që qarkullojnë nëpër mediat vendore, Komisioni Europian përgatit sanksione ekonomike ndaj Maqedonisë, ku jo-zyrtarisht njëra prej masave do jetë bllokimi i llogarive bankare. Kjo shihet si mundësi për të zmbrapsur kryesin e VMRO-DPMNE, e cila edhe ashtu është e izoluar nga komuniteti ndërkombëtar.
/Almakos.com
