“Jetojmë në demokraci dhe të gjithë kanë të drejtë të dalin në rrugë për të protestuar dhe për të shprehur revoltën e tyre, por sindikatave tashmë ka skaduar mandati dhe nuk janë më përfaqësues”, tha sot ministri i Ekonomisë dhe Punës, Besar Durmishi.
“Ne si qeveri kemi formuar komision për të përcaktuar përfaqësimin e sindikatave dhe ai komision tashmë është duke punuar. Sapo të përcaktohet se cila sindikatë është përfaqësuese, do të thërras seancën e Këshillit Socio-Ekonomik (KSE). Aty sindikatat duhet të shprehin kërkesat e tyre, jo në rrugë”, tha Durmishi.
Ai gjithashtu theksoi se si qeveri i respektojnë dhe se janë pro dialogut social.
“Nëse sindikatat dhe punëdhënësit bien dakord për ndonjë bazë tjetër dhe për ndonjë metodologji dhe zgjidhje tjetër ligjore për përcaktimin e pagës minimale, ne si Qeveri jemi këtu për t’i ndihmuar dhe plotësuar nevojat e tyre”, theksoi Durmishi.
Ai gjithashtu tha se Qeveria ka vepruar sipas ligjit dhe metodologjisë për pagën minimale, me të cilën janë respektuar të gjitha palët e interesuara, gjegjësisht sindikatat dhe punëdhënësit.
“Sipas asaj rregullore, paga minimale është 400 euro dhe paga neto është rritur për 1800 denarë. Si ministër kompetent i Ekonomisë dhe Punës e kam shpallur pagën minimale me vendim të Qeverisë”, tha Durmishi.
Ai theksoi se për lartësinë e pagës minimale nuk kanë pasur pëlqimin e KSE-së për shkak se nuk ka përfaqësim nga sindikatat.
“Sipas ligjit që është në fuqi dhe i firmosur si nga sindikatat ashtu edhe nga punëdhënësit dhe me vendim të Qeverisë jam i detyruar të shpall pagën minimale para datës 31 mars. Më pas, paga mesatare dhe pagat e tjera llogariten nga paga minimale. Nëse nuk do ta kishim publikuar deri më 31 mars, i gjithë vendi dhe të gjitha institucionet do të ishin bllokuar dhe sektori privat nuk do të mund të llogariste pagat për punonjësit e tij”, theksoi Durmishi.
