Qytetarët e Durrësit protestuan sot (6 maj) me një marshim zie, në kujtim të dy të miturve që humbën jetën tragjikisht në aksidentin e të dielës.
Ata të indinjuar shprehën revoltën e tyre për masat e munguara dhe tolerimin që u bëhet shoferëve kundravajtës apo problematikë, që shkaktojnë tragjeditë.
Qytetarët janë mbledhur pranë stadiumit të Durrësit, nga ku nisën edhe ecjen në këmbë përgjatë rrugës “Aleksandër Goga”, me destinacion përfundimtar para Bashkisë së Durrësit.
Në protestë morën pjesë familjarë të viktimave, banorë të zonës së Ish-Kënetës, si dhe shokë e bashkëmoshatarë të fëmijëve, si dhe anëtarë të partive opozitare.
Nxënësit kanë mbajtur në duar pankarta me mesazhe prekëse, ku ndër të tjera shkruhet: “Engjëj në qiell, nuk ishin numra, ishin fëmijë”, “Kjo plagë nuk mbyllet pa drejtësi”, “Ne duam drejtësi për dy engjëjt” dhe “Qielli fitoi dy engjëj, ne humbëm dy buzëqeshje të pafajshme”.
Një tjetër pankartë thekson kërkesën për më shumë siguri për fëmijët:
“Duam park për fëmijë. Fëmijët kanë të drejtë të jetojnë, të luajnë dhe të rriten të sigurt. Kur këto të drejta shkelen, ne ngrihemi dhe kërkojmë drejtësi”.
Në krye të marshimit ndodhet një automjet me një pankartë të madhe ku shkruhet:
“Dy jetë të mitura u fikën, ku është drejtësia”.
