18 vjeçari nga Kumanova, Ardi Saiti u arrestua mbrëmë nga policia në Kumanovë për shkak siç bëhet e ditur vetëm pse mbante flamurin kombëtar shqiptar me rastin e festimeve për 28 Nëntorin.
Familjarët theksuan se arrestimi ka ndodhur pa asnjë arsye dhe në mënyrë të tmerrshme duke e çuar në stacion policor dhe duke e mbajtur deri sot në mesditë.
Lidhur me këtë ngjarje ka reaguar dega e BDI-së në Kumanovë që thekson se “shpreh shqetësimin e thellë dhe indinjatën e saj lidhur me arrestimin e të riut kumanovar, Ardi Saiti, i cili mbrëmë u ndalua nga ana e policisë vetëm pse gjatë festës sonë kombëtare mbante në dorë flamurin kombëtar shqiptar. Ndaj tij madje është proceduar edhe lënda në Prokurori, gjë që e konsiderojmë të padrejtë dhe të papranueshme.”
Sipas BDI, edhe më shqetësues mbetet fakti se arrestimi është kryer nga i njëjti polic që vitin e kaluar përdhosi flamurin tonë kombëtar, person i njohur në Kumanovë me nofkën “Kasapi”, i cili, në vend që të përballej me masa disiplinore për aktet e tij, vazhdon të avancohet brenda strukturave policore.
“Kjo qasje e institucioneve jo vetëm që dëmton besimin e qytetarëve, por përbën edhe një akt të hapur albanofobie. Dega e BDI-së në Kumanovë kërkon sqarim të menjëhershëm nga organet kompetente, përgjegjësi institucionale dhe trajtim të barabartë për të gjithë qytetarët, pa dallim etnik. Ne do të ndjekim nga afër këtë rast deri në sqarimin e plotë të tij dhe garantimin e të drejtave të qytetarëve tanë”, thuhet në reagim.
Nga SPB Kumanovë ende nuk ka dhënë detaje lidhur me këtë rast.
