Shtetet e Bashkuara të Amerikës (SHBA) thonë se do të punojnë me Maqedoninë e Veriut dhe Greqinë për të ruajtur përfitimet e Marrëveshjes së Prespës, pasi kryeministri Hristijan Mickoski nuk e përdori emrin kushtetues të vendit në deklaratat publike gjatë samitit të NATO-s në Uashington, informon PRESSonline.al
Kur u bë kryeministër, Mickoski tha se në një kontekst zyrtar vendin do ta quante Maqedoni në përdorim të brendshëm, ndërsa Maqedoninë e Veriut në përdorim të jashtëm.
Në pyetjen nëse Shtetet e Bashkuara do të bisedojnë me qeverinë e re sepse kryeministri nuk e ka përdorur emrin zyrtar të vendit as në Uashington, nga Departamenti i Shtetit thonë se Shtetet e Bashkuara mbështesin këtë marrëveshje jetike.
“Marrëveshja e Prespës ishte një arritje historike në zhbllokimin e arritjeve të sigurisë në Evropën Jugore dhe Lindore. Shtetet e Bashkuara mbështesin këtë marrëveshje jetike, ritheksojnë rëndësinë e respektimit të saj dhe do të punojnë me të gjitha palët për të ruajtur përfitimet e saj”, thuhet në përgjigjen e DASH për Zërit të Amerikës në gjuhën maqedonase, përcjell PRESSonline.al
Për tre ditët e fundit gjatë samitit të NATO-s në Uashington, Mickoski në deklaratat dhe shkrimet e tij publike në rrjetin social X, shtetin e quajti Maqedoni. Ai deklaroi publikisht emrin zyrtar të vendit disa herë gjatë një debati në Shkollën e Marrëdhënieve Ndërkombëtare të Universitetit Johns Hopkins në Uashington.
Mirëpo, kryeministri grek Kyriakos Mitsotakis, gjatë një konference për mediat greke në Samitin e NATO-s në Uashington, tha se kryeministri Mitsukoski përdori emrin kushtetues të vendit në takimet zyrtare të të gjithë liderëve të NATO-s.
Samiti i NATO-s në Uashington ka përfunduar, por nuk ka informacione zyrtare nëse Mitsotakis dhe Mickoski janë takuar gjatë mbajtjes së tij.
