Çiftet e reja që vendosin të kthehen në fshat do të mund të marrin deri në njëqind mijë euro. Qeveria po planifikon një masë të tillë me qëllim ringjalljen e vendeve të braktisura në Maqedoni. Ligji i ri për Bujqësinë dhe Zhvillimin Rural është publikuar tashmë në ENER dhe do të jetë i disponueshëm për shqyrtim publik deri më 28 maj, ndërsa një seancë dëgjimore publike është planifikuar për 2 qershor.
Ndihma financiare është planifikuar t’i ndihmojë ata të ndërtojnë ose rindërtojnë ndërtesa, të blejnë makineri bujqësore, tokë bujqësore ose bagëti, dhe kushti kryesor për të marrë këtë mbështetje është që ata të mos jenë më të vjetër se 40 vjeç, të merren me aktivitet bujqësor dhe të jetojnë në mjedisin rural brenda kuadrit të ekonomisë bujqësore familjare për 10 vitet e ardhshme. Nëse çifti i ri nuk e përmbush kërkesën për të jetuar dhe punuar në fshat për 10 vjet, ata do të duhet të shlyejnë të gjithë shumën e mbështetjes së ofruar.
“Mbështetja financiare arrin në 80% të vlerës së kostove të pranueshme dhe të realizuara, deri në një maksimum prej 6.000.000 denarësh për çift bashkëshortor. Periudha e përdorimit të mbështetjes është një cikël projekti që zgjat 3 vjet rresht. Mbështetja zbatohet përmes një plani biznesi të miratuar nga Agjencia”, thuhet në nenin 138 të tekstit të propozuar të ligjit-Agjencia për Mbështetje Financiare në Bujqësi dhe Zhvillim Rural.
E njëjta shumë parash do të jetë në dispozicion për të rinjtë nën moshën 40 vjeç që do të hapin një biznes të lidhur me bujqësinë ose pylltarinë, dhe mbështetje prej 20.000 eurosh do t’u ofrohet gjithashtu fermerëve të rinj që do të fillojnë një aktivitet bujqësor, si dhe anëtareve aktive femra të një familjeje bujqësore dhe për zhvillimin e mikrondërmarrjeve, futjen e praktikave inovative dhe futjen e aktiviteteve të reja ekonomike në fshat.
