Me përfundimin e mbështetjes për Windows 10 më 14 tetor 2025, përdoruesit po përballen me një dilemë të rëndësishme: si të mbrojnë pajisjet e tyre nga kërcënimet e sigurisë?
Microsoft ka njoftuar se pas kësaj date, Windows 10 nuk do të marrë më përditësime, duke lënë miliona përdorues në rrezik. Çdo kompjuter që vazhdon të përdorë këtë sistem operativ do të jetë i ndjeshëm ndaj sulmeve dhe problemeve të tjera të sigurisë.
Ekspertët e teknologjisë paralajmërojnë se vazhdimi i përdorimit të Windows 10 pa bërë asnjë ndryshim është një vendim i rrezikshëm. Kjo mund të çojë në humbje të dhënash dhe probleme të tjera në punën e përditshme, duke e bërë të domosdoshme që përdoruesit të veprojnë tani.
Një nga zgjidhjet më të lehta është kalimi në Windows 11, por kjo varet nga kapacitetet e pajisjes. Microsoft ofron një mjet për të kontrolluar nëse kompjuteri i plotëson kërkesat për instalimin e sistemit të ri.
Për ata që nuk janë gati të kalojnë menjëherë, mund të shqyrtojnë programin Extended Security Updates, një shërbim me pagesë që ofron mbështetje për një periudhë të caktuar, megjithatë, detajet mbi kohëzgjatjen e tij ende nuk janë të qarta.
Një mundësi tjetër është përmirësimi i Windows 10 në Windows 11 pa e riinstaluar plotësisht sistemin. Kjo do të ruajë programet dhe dokumentet ekzistuese, por ekspertët paralajmërojnë se ky proces mund të jetë teknikisht i vështirë dhe i rrezikshëm nëse nuk kryhet me kujdes.
Për ata që kërkojnë një alternativë të plotë ndaj Microsoft, sistemi operativ Linux ofron një zgjidhje të qëndrueshme dhe falas. Megjithatë, kalimi në Linux kërkon një periudhë adaptimi, pasi është ndryshe nga Windows.
Nëse asnjë nga këto mundësi nuk është e përshtatshme, ndoshta është koha për të investuar në një laptop të ri. Ekspertët rekomandojnë zgjedhjen e pajisjeve me memorie të zgjerueshme dhe ruajtje SSD, si dhe një bateri të zëvendësueshme, për të siguruar një jetëgjatësi më të gjatë të pajisjes.
