Një në tre fëmijë në Maqedoni është i varfër, vetëm 1 në 300 fëmijë që i takon një familjeje të varfër shkon në kopsht dhe vetëm 2 nga 3 fëmijë që u takojnë familjeve të varfëra shkojnë në shkollë të mesme. Kështu thonë të dhënat statistikore, sipas të cilave rreth 60 mijë fëmijë në Maqedoni janë të varfër. Ministrja e Punës dhe Politikës Sociale, Milla Carovska, tha se varfëria e fëmijëve i kushton shumë secilit shtet. Ajo nënvizoi se për këtë arsye Qeveria me reformat e reja do të mundësojë ndihma shkollore dhe ndihma për fëmijë për më shumë se 60 mijë fëmijë.
Milla Carovska, Ministre e punës dhe politikës sociale
“Reforma parasheh shtesa për fëmijë dhe shtesa arsimore, secila familje që ka një pagë minimale për dy fëmijë në shkollë të mesme dhe fillore do të merr rreth 3300 denarë, njëra shtesë arsimore tjetra është shtesë për fëmijë. Familjet që deri më tani kanë qenë me ndihma sociale dhe më pas me të ardhura të garantuara, do t’i marrë të njejtat mjete me qëllim që të përmirësohen statusi i fëmijëve. ”
Përfaqësuesi i UNICEF-it, Benxhamin Perks duke u përgjigjur pyetjes së gazetarëve theksoi se shuma prej 3300 denarëve nuk është e mjaftueshme që t’u ndihmohet fëmijëve që të dalin nga varfëria.
Benxhamin Perks, Përfaqësues i UNICEF-it
“Unë mendoj se këto të ardhura, ndihma sociale nuk janë të mjaftueshme që të nxiret familja nga varfëria, duhet të investohet në arsimim, në krijimin e vendeve të reja të punës, në mundësi nga jashtë, të themi investime të huaja, ku do të rritet mundësia për ekzistencë në mënyrë të pavarur dhe dalje nga varfëria. Për momentin është me rëndësi që duhet të fillojmë ta përmirësojmë gjendjen nga një pozicion shumë i ulët fillestar. ”
Ndërkaq Drejtori i Zyrave të Bankës Botërore për Kosovë dhe Maqedoni, Marko Mantovanelli, tha se zgjidhja është në mundësimin e qasjes tek mundësitë dhe për këtë arsye ai shprehi kënaqësinë për bashkëpunimin me Ministrinë e punës sociale në trajtimin e këtyre çështjeve dhe përmirësimin e jetës për këta fëmijë.
Marko Mantovanelli, Drejtori i Zyrave të Bankës Botërore për Kosovë dhe Maqedoni
“ Pavarësisht përpjekjeve të bëra për uljen e varfërisë, megjithatë 1 nga tre fëmijë janë të varfër dhe me këtë krijohen probleme me gjithçka që bëjnë në të ardhmen e tyre. ”
Këto komente u bënë në konferencën kushtuar varfërisë tek fëmijët, e organizuar nga UNICEF, Banka Botërore dhe Ministria e punës dhe politikës sociale.
Ajnur Bafqari /SHENJA/
