Në kuadër të ceremonisë zyrtare me rastin e lëshimit të Garancive të para të Origjinës së
energjisë elektrike nga burimet e rinovueshme, Operatori kombëtar i tregut të energjisë elektrike
– MEMO, i dorëzoi një mirënjohje zyrtare ministres së energjetikës, minierave dhe burimeve
minerale, Sanja Bozhinovska.
Mirënjohja iu dha si njohje të angazhimit personal dhe angazhimit institucional të ministres
Bozhinovska në zhbllokimin dhe finalizimin e procesit kompleks të krijimit të sistemit të
Garancive të Origjinës – një proces që ka stagnuar për gati dy vjet, i ngarkuar me sfida teknike,
rregullatore dhe koordinuese.
“Përmes mbështetjes së qartë institucionale, koordinimit ndërministror dhe përfshirjes së
drejtpërdrejtë në zgjidhjen e pengesave kryesore, ministrja Bozhinovska luajti një rol kyç në
aktivizimin e saj përfundimtar”, deklaroi drejtori i MEMO-s Zoran Gjorgievski, duke prezantuar
mirënjohjen.
Garancitë e origjinës janë një hap thelbësor përpara drejt një transformimi të gjelbër dhe të
qëndrueshëm të energjisë së vendit, një mekanizëm që hap derën për një treg transparent,
konkurrues dhe të harmonizuar me Bashkimin Evropian.
Në të njëjtën ngjarje, ministrja Bozhinovska i dha zyrtarisht certifikatat e para të origjinës së
energjisë elektrike nga burimet e rinovueshme kompanisë SHA ESM. Këto janë garanci për
energjinë elektrike të prodhuar në hidrocentralet e ESM, të cilat certifikojnë se energjia ka një
origjinë të pastër, të rinovueshme dhe të qëndrueshme mjedisore.
“Për ne është veçanërisht domethënëse për ne që garancitë e para të lëshuara kanë të bëjnë me
energjinë elektrike të prodhuar nga hidrocentralet e SHA ESM që përdorin energji të pastër dhe
të rinovueshme nga uji. Kjo është një dëshmi e përpjekjeve tona të vazhdueshme për të prodhuar
energji elektrike në një mënyrë miqësore me mjedisin dhe angazhimit tonë për tranzicionin e
gjelbër. Garancia do t’u ofrojë klientëve tanë siguri në origjinën e energjisë që blejnë dhe do të
kontribuojë në rritjen e ndërgjegjësimit për rëndësinë e burimeve të rinovushme”, theksoi drejtori
i përgjithshëm i SHA ESM, Lazo Uzunçev.
Me krijimin e këtij sistemi, Maqedonia e Veriut po bën një hap të madh përpara në integrimin me
tregun evropian të energjisë, duke rritur transparencën, qëndrueshmërinë dhe stabilitetin afatgjatë
të sistemit energjetik vendas.
