Garancia e financuar nga BE-ja për Ballkanin Perëndimor për Qëndrueshmërinë e Ndërmarrjeve të Vogla dhe të Mesme- NVM-ve mbështet financimin me kushte të favorshme kreditimi, duke kontribuar në rritjen e bizneseve të vogla dhe duke nxitur punësimin dhe konkurrueshmërinë. Kjo iniciativë plotëson angazhimin më të gjerë të BE-së ndaj rajonit në kuadër të Programit të Reformës dhe Rritjes për Ballkanin Perëndimor, duke përmirësuar qasjen në financim për NVM-të, një nxitës kyç i rritjes gjithëpërfshirëse dhe krijimit të vendeve të punës.
Që nga sot, ky program garancie prej 60 milionë eurosh i financuar nga BE-ja ka zhbllokuar një total prej 886 milionë eurosh financim për NVM-të, duke ofruar kushte të favorshme kreditimi që synojnë të mbështesin 15,000 kompani dhe të ruajnë 140,000 vende pune.
Fondi Europian i Investimeve (FEI), pjesë e Grupit të Bankës Europiane të Investimeve (BEI), ka nënshkruar marrëveshje garancie prej 4.8 milionë eurosh, pjesa e fundit e fondeve të BE-së prej 60 milionë eurosh që do të ndahen nga garancioni i BE-së, me Sparkasse Bank Ad Skopje, Sparkasse Bank B&H dhe Erste Bank Podgoricë. Këto 4.8 milionë do t’u lejojnë bankave lokale të krijojnë një portofol të ri për të financuar ndërmarrjet e vogla dhe të mesme (NVM) me një total prej 60 milionë eurosh në kredi koncesionare në kuadër të iniciativës Garancia për qëndrueshmërinë e NVM-ve, të lehtësuar nga Korniza e Investimeve për Ballkanin Perëndimor e Bashkimit Europian. Erste & Steiermärkische Bank d.d., me seli në Kroaci, do të menaxhojë koordinimin e garancive.
Financuar nga Bashkimi Europian, kjo iniciativë synon të rrisë qasjen në financim të favorshëm për NVM-të për t’i ndihmuar ato t’i përgjigjen sfidave të tregut, të zgjerojnë bizneset e tyre dhe të krijojnë vende pune. Në Maqedoninë e Veriut, pritet që ky instrument të mobilizojë mbi 20 milionë euro në kredi koncesionare për rreth 125 biznese të vogla. Ai gjithashtu do të zhbllokojë 25 milionë euro në kredi për Bosnjën dhe Hercegovinën, duke mbështetur 150 biznese, si dhe 15 milionë euro në linja kredie për 100 kompani në Mal të Zi. Fondet pritet të ndihmojnë në ruajtjen e rreth 5 750 vendeve të punës.
Drejtoresha Ekzekutive e EIF-së, Marjut Falkstedt, tha: “Këto garanci do t’u mundësojnë bankave tona partnere të ofrojnë kredi me kushte të favorshme për bizneset në Maqedoninë e Veriut, Bosnjën dhe Hercegovinën dhe Malin e Zi, duke ofruar norma interesi më të ulëta, kërkesa të reduktuara për kolateral dhe afate të zgjatura maturimi. Kjo mbështetje do t’i ndihmojë kompanitë të zgjerojnë operacionet e tyre dhe të përshtaten me zhvillimet e fundit të tregut, duke nxitur kështu një ekonomi konkurruese dhe elastike.”
Komisionerja për Zgjerim, Marta Kos, tha: “Nënshkrimi i këtyre marrëveshjeve të reja të garancisë shënon një hap tjetër të rëndësishëm në thellimin e partneritetit të BE-së me Ballkanin Perëndimor. Me 4.8 milionë euro mbështetje nga BE-ja, këto garanci do të zhbllokojnë deri në 60 milionë euro në kredi koncesionare, duke përmirësuar ndjeshëm qasjen në financim të përballueshëm për ndërmarrjet mikro, të vogla dhe të mesme në Maqedoninë e Veriut, Bosnjë dhe Hercegovinë dhe Mal të Zi. Kjo iniciativë mbështet drejtpërdrejt qëllimet e Instrumentit për Reforma dhe Rritje për Ballkanin Perëndimor, duke ndihmuar bizneset të rriten, të krijojnë vende pune cilësore dhe të forcojnë konkurrueshmërinë e rajonit. Nëpërmjet një mbështetje kaq konkrete dhe të synuar ne avansojmë qëndrueshmërinë ekonomike dhe e sjellim Ballkanin Perëndimor më afër të ardhmes së vet europiane.”
Christoph Schoefboeck, Drejtor Ekzekutiv i Erste & Steiermärkische Bank d.d. tha: “Jemi shumë të kënaqur që patëm mundësinë të menaxhojmë koordinimin e Garancisë së Ballkanit Perëndimor për qëndrueshmërinë e NVM-ve sipas skemës Umbrella, të lehtësuar nga Korniza e Investimeve në Ballkanin Perëndimor e Bashkimit Europian. Me përvojën dhe njohuritë tona të bazuara mirë, të mbështetura nga një bashkëpunim afatgjatë dhe i suksesshëm midis Erste Bank Croatia dhe Grupit BEI, ne mezi presim të mbështesim kolegët tanë në Maqedoninë e Veriut, Bosnjë dhe Hercegovinë dhe Mal të Zi për t’u ofruar klientëve të tyre kushte më të favorshme kreditimi. Ne besojmë se ndërmarrjet e vogla dhe të mesme janë shtylla kurrizore dhe nxitësit e rëndësishëm të zhvillimit ekonomik. Prandaj, jemi të bindur se një skemë e tillë e portofolit financues do të kontribuojë në konkurrueshmërinë e tyre më të fortë dhe më elastike në tregjet lokale.”
Që kur Garancia e Ballkanit Perëndimor për qëndrueshmërinë e NVM-ve u lançua në nëntor të vitit 2022, FEI – në partneritet me Komisionin Europian – ka nënshkruar marrëveshje garancie me 18 institucione financiare në të gjithë rajonin, duke zhbllokuar një total prej 886 milionë eurosh në kredi me kushte të favorshme kreditimi, të cilat pritet të mbështesin 15 000 kompani dhe të sigurojnë 140 000 vende pune në Ballkanin Perëndimor.
Fondi Europian i Investimeve (FEI) është pjesë e Grupit të Bankës Europiane të Investimeve (BEI). Ai mbështet ndërmarrjet e vogla dhe të mesme (NVM) në Europë duke përmirësuar qasjen e tyre në financim përmes një game të gjerë ndërmjetësuesish financiarë të përzgjedhur. FEI harton, promovon dhe zbaton instrumente financimi me kapital dhe borxh që synojnë NVM-të. Në këtë rol, FEI nxit objektivat e BE-së në mbështetje të sipërmarrësisë, rritjes, inovacionit, kërkimit dhe zhvillimit, tranzicioneve të gjelbra dhe dixhitale dhe punësimit. Grupi BEI, i cili përfshin gjithashtu Fondin Europian të Investimeve (FEI), nënshkroi gati 89 miliardë euro në financim të ri për mbi 900 projekte me ndikim të lartë në vitin 2024, duke rritur konkurrueshmërinë dhe sigurinë e Europës.
Të gjitha projektet e financuara nga Grupi BEI janë në përputhje me Marrëveshjen e Parisit për Klimën, siç është zotuar në Udhërrëfyesin tonë të Bankës së Klimës.
Pothuajse 60% e financimit vjetor të Grupit BEI mbështet projekte që kontribuojnë drejtpërdrejt në zbutjen e ndryshimeve klimatike, përshtatjen dhe një mjedis më të shëndetshëm. Duke nxitur integrimin e tregut dhe duke mobilizuar investimet, Grupi mbështeti një rekord prej mbi 100 miliardë eurosh në investime të reja për sigurinë energjetike të Europës në vitin 2024 dhe mobilizoi 110 miliardë euro në kapital rritjeje për startup-et, bizneset dhe pionierët europianë. Përafërsisht gjysma e financimit të BEI-së brenda Bashkimit Europian është e drejtuar drejt rajoneve të kohezionit, ku të ardhurat për kokë banori janë më të ulëta se mesatarja e BE-së.
