Bashkimi Demokratik për Integrim shpreh shqetësim serioz ndaj miratimit nga Qeveria të Propozim-ligjit për përfaqësim të drejtë dhe adekuat, i cili në thelb nuk ofron zgjidhje, por mashtron duke thelluar pabarazitë në përfaqësim dhe shmang detyrimet kushtetuese.
Distancimi publik i anëtarit shqiptar të grupit punues, prof. dr. Mersim Maksuti, është alarmi më i qartë që ky propozim-ligj është i dështuar në vetë thelbin e tij. Në mendimin e tij të ndarë, Maksuti e ka cilësuar propozim-ligjin si skandaloz, jopraktik dhe në kundërshtim me Kushtetutën, duke denoncuar mungesën e kuotave për komunitetet më pak të përfaqësuara, mekanizmat e dobët të zbatimit dhe mbështetjen mbi vullnet politik, në vend të detyrimeve ligjore.
Ligji nuk garanton asnjë kuotë për përfaqësimin e bashkësive etnike, duke relativizuar të drejtën kolektive të përfaqësimit me kritere të mjegullta dhe përjashtuese si “profesionalizmi” dhe “kompetenca”, ashtu si para vitit 2001.
Trupi Koordinues i propozuar është farsë, i pafuqishëm, pa drejtim politik të përcaktuar qartë dhe pa kompetenca reale për të kërkuar përgjegjësi nga institucionet që shkelin ligjin.
Ligji është ndërtuar mbi interesat dhe idetë e Karakamishevës, jo mbi nevojat reale të qytetarëve të diskriminuar. Ai është miratuar vetëm për t’u dërguar në Komisionin e Venecias, duke anashkaluar debatin publik të brendshëm.
Mungesa e sanksioneve dhe përgjegjësisë ligjore e bën këtë ligj një dokument propagandistik, pa fuqi detyruese dhe pa ndikim real në përmirësimin e përfaqësimit.
Referenca në vendimin e Gjykatës Kushtetuese është keqpërdorur, për të justifikuar shmangien e kuotave. Kushtetuta e RMV-së, përmes Amendamentit VI, garanton qartë të drejtën për përfaqësim adekuat dhe të drejtë si një e drejtë kolektive, e cila nuk mund të relativizohet me ligj të dobët.
BDI vlerëson se refuzimi publik i këtij ligji nga prof. Maksuti është tregues i qartë se ky nuk është ligj i gjithë qytetarëve të RMV-së, por një akt i centralizuar dhe i dizajnuar për të mbrojtur status quo-në diskriminuese.
Ne i qëndrojmë besnikë Marrëveshjes së Ohrit, Kushtetutës së vendit dhe të drejtës themelore të çdo qytetari për përfaqësim të drejtë dhe adekuat në institucionet publike. Për ne, përfaqësimi nuk është opsion politik, por obligim kushtetues dhe moral.
