Kreu demokrat Lulzim Basha ka mbajtur një fjalim për mediat, para nisjes së mbledhjes së grupit parlamentar. Basha ka vijuar akuzat në drejtim të qeverisë. Sipas tij Klement Balili nuk kapet pasi punon që t’u sigurojë pushtetarëve miliarda.
“Shqiptaret po largohen masivisht nga vendi dhe gjendja është pa shpresë për të ardhmen, Dalja nga kjo gjendje është e qartë. Mesazhet i kam marrë në SHBA e Bruksel dhe janë konfirmuar nga KE dhe rezoluta e PE se dalja e Shqipërisë nga kjo gjendje kalon përmes largimit të kriminaleve nga politika dhe zgjedhjeve të lira.
Kalon përmes zbatimit të reformës në drejtësi. Kjo është dalja e Shqipërisë nga kriza që ndodhet. Rilindja e 1 prillit ka vetëm një synim, të mbajë Shqipërinë kështu siç është dhe të pandryshuar, sepse kjo gjendje u siguron atyre pasurinë dhe pushtetin. Rilindja ka krijuar miliarda dhe luks përmes korrupsionit dhe krimit. Duhet që Balili të vazhdojë të punojnë që të sigurojë miliarda euro. E vetmja mënyrë për të mbajtur pushtetin është pushtimi i zgjedhjeve për ta. Zgjedhjet e lira janë fundi i politikanëve arrogantë të lidhur me krimin. Ata janë gati të përdorin kriminelët dhe mediat për të fshehur të vërtetën. Blerja e votës është skenari që do të shkatërrojë të ardhmen e Shqipërisë dhe të fëmijëve. Ketë skenar e kanë denoncuar dhe anëtarë të qeverisë”, deklaroi Basha.
1 shkurt 2017 (gazeta-Shqip.com)
