Policia e Lezhës ka gjetur sot (29 prill) edhe një automjet tip “Audi A4”, i cili dyshohet se është përdorur nga vrasësit e çiftit Kreshnik dhe Gentjana Mujeci, ngjarje e cila ndodhi ditën e diele në Balldre, me pasoja fatale.
Për vrasjen e dyfishtë janë shpallur në kërkim 3 persona si atentatorë, dy prej të cilëve janë djali dhe nipi i viktimës së konfliktit hakmarrës mes dy familjeve, e për të cilën dyshohej Mujeci.
Njoftimi i policisë:
“Vijojnë veprimet e thelluara hetimore dhe kontrollet në terren për sigurimin e të gjitha provave që shërbejnë për dokumentimin e plotë ligjor të autorësisë së ngjarjes së ndodhur më datë 26.04.2026, në fshatin Balldren.
Si rezultat i hetimeve, informacioneve të siguruara dhe kontrolleve të imtësishme në terren, të kryera nga shërbimet, në fshatin Torovicë, në një rrugë dytësore, në tokë arë, pranë një kanali, u gjet një automjet tip “Audi A4”, i cili dyshohet se është i përfshirë në dinamikën e ngjarjes dhe se është përdorur nga bashkautorët, të cilët kanë pasur rolin e vëzhguesve të lëvizjeve të viktimave.
Gjatë këqyrjes së tij, brenda automjetit u gjetën dokumentacione që u përkisnin autorëve të shpallur në kërkim.
Me qëllim kryerjen e verifikimeve më të specializuara, automjeti u sekuestrua në cilësinë e provës materiale dhe do t’i nënshtrohet ekspertizave kriminalistike.
Ndërkohë, në mënyrë intensive dhe të pandërprerë, vijon kontrolli i zonave për lokalizimin dhe kapjen e autorëve të shpallur në kërkim.
Materialet procedurale iu referuan Prokurorisë së Lezhës për veprime të mëtejshme”.
