Arrestohen 24 persona për shpërndarje joligjore të subvencioneve, ja sa e kanë dëmtuar buxhetin e shtetit

Prokuroria Themelore Publike për ndjekje të krimit të organizuar dhe korrupsionit sot ka njoftuar se në bashkëpunim me MPB-në, janë arrestuar 24 perona. Ata janë të dyshuar për veprën penale kundër detyrës zyrtare dhe autorizimeve. Aksioni është zhvilluar në Shkup, Tetovë, Gjevgjeli dhe Vallandovë.
Në njoftimin e PTHP-së, transmeton SHENJA, thuhet se të dyshuarit me veprimet e tyre jashtë ligjore kanë dëmtuar buxhetin e Maqedonisë në vlerë prej 220 mijë euro.
“Në mesin e të dyshuarve janë 15 zyrtarë të punësuar në Ministrinë e Bujqësisë dhe njësitet rajonale të kësaj ministrie, ndërsa të dyshuarit tjerë janë persona fizik dhe persona përgjegjës juridik në pronësi private. Dyshimi është se në periudhën prej vitit 2011 deri në vitin 2016 të dyshuarit kanë shfrytëzuar autorizimet e tyre dhe kanë tejkaluar këto autorizime gjatë nënshkrimit dhe prishjes së Kontratave për blerjen e tokës bujqësore. Gjatë veprimeve joligjore kanë qenë të ndihmuar nga persona tjerë të dyshuar. Në të njëjtën kohë kanë miratuar pagesa në bazë të Programit për ndihmë financiare në bujqësi- subvencione, dhe në këtë mënyrë kanë përfituar për më shumë persona fizik dhe juridik në dëm të Buxhetit të Maqedonisë”, thuhet në komunikatën e PTHP-së.
Prokurori Publik përgjegjës deri tek gjykatësi i procedurës paraprake pranë Gjykatës themelore Shkupi 1, ka dorëzuar propozim për përcaktimin e masës së paraburgimit për shtatë persona të dyshuar.