Në pyetjen se për cilën parti politike do të votonin në zgjedhjet e ardhshme, nga përgjigjet e të anketuarve rezulton se për VMRO-DPMNE-në do të votonin 20.5 për qind, për LSDM-në 6.2 për qind, për BDI-në 5 për qind, për VLEN-in 4.4 për qind, për Levicën 2.9 për qind, ndërsa për ZNAM-in 1.5 për qind. Kjo konstatohet në anketën më të re të Market Vision, të porositur nga portali MKD.mk.
Në periudhën prej 10 deri më 27 qershor, anketuesit e agjencisë Market Vision, me porosi të portalit MKD.mk, realizuan një hulumtim të opinionit publik në Maqedoni. Rezultatet tregojnë se partia në pushtet, VMRO-DPMNE, dhe lideri i saj vazhdojnë të kenë epërsi bindëse sa i përket besimit të qytetarëve. Interesant është edhe fakti se liderët e partisë së re politike VLEN kanë rejting më të lartë në krahasim me liderin e BDI-së opozitare.
Në pyetjen se për cilën parti politike do të votonin në zgjedhjet e ardhshme, përgjigjet e të anketuarve tregojnë se për VMRO-DPMNE-në do të votonin 20.5 për qind, për LSDM-në 6.2 për qind, për BDI-në 5 për qind, për VLEN-in 4.4 për qind, për Levicën 2.9 për qind, ndërsa për ZNAM-in 1.5 për qind.
Nëse veçohen rejtingjet e partive vetëm te të anketuarit e përcaktuar, gjithsej 497 nga 1.200 të anketuar, raporti i epërsisë së VMRO-DPMNE-së ndaj LSDM-së mbetet pothuajse i njëjtë. Rejtingu i VLEN-it po i afrohet me shpejtësi popullaritetit të BDI-së te votuesit shqiptarë në Maqedoni.
Edhe te liderët e partive politike, vitet e fundit mbetet bindëse epërsia e Hristijan Mickoskit në krahasim me liderët e tjerë. Izet Mexhiti dhe Bilall Kasami, si drejtues të VLEN-it, kanë rejting më të lartë se Ali Ahmeti, lideri i BDI-së.
Edhe kjo anketë tregon se pagat, pensionet, papunësia dhe rritja e çmimeve janë problemet më të mëdha me të cilat përballen qytetarët e Maqedonisë. Në vendin e dytë, sërish, renditen krimi dhe korrupsioni. Të anketuarit janë pyetur edhe se sa janë të kënaqur me punën e prokurorit të ri publik dhe të Prokurorisë Publike.
Mosbesimi ndaj gjyqësorit në përgjithësi vazhdon të mbetet një nga problemet kryesore me të cilat përballet Maqedonia.
Se qytetarët e Maqedonisë mbeten të përkushtuar ndaj proceseve eurointegruese, e tregon edhe përgjigjja pozitive në pyetjen për anëtarësimin e mundshëm të Maqedonisë në Bashkimin Evropian, duke pranuar edhe modelin për të cilin tashmë po diskutohet: anëtarësim pa të drejtë vetoje. Madje 80.3 për qind e të anketuarve do ta pranonin edhe një formë të tillë anëtarësimi.
Hulumtimi është realizuar në periudhën prej 10 deri më 27 qershor, në një mostër prej 1.200 të anketuarish, përfaqësuese sipas gjinisë, moshës, përkatësisë etnike, rajonit dhe llojit të vendbanimit, në përputhje me të dhënat e regjistrimit të popullsisë rezidente të vitit 2021.
Hulumtimi është realizuar me metodën CATI, përkatësisht intervistë telefonike e asistuar nga kompjuteri, me nivel besueshmërie prej 95 për qind dhe margjinë gabimi prej plus/minus 3 për qind./mkd.mk
