Pas aksidentit tragjik ku humbën jetën dy të mitur dhe u plagos rëndë një tjetër, është pezulluar nga detyra zinxhiri komandues i Policisë së Durrësit.
Drejtori i Përgjithshëm i Policisë së Shtetit, Skënder Hita ka urdhëruar pezullimin e drejtuesit të policisë së Durrësit, Afrim Tafa, zëvendës drejtorit të Rendit dhe Sigurisë Publike Zija Sulaj si edhe shefit të Policisë Rrugore Kreshnik Skëndo.
Po ashtu kryepolici ka urdhëruar ngritjen e një grupi ekspertësh, të cilët kanë shkuar në vendngjarje për të analizuar shkaqet dhe rrethanat e aksidentit. Po ashtu, ndaj uniformave blu ka nisur një hetim disiplinor për ë vlerësuar nëse ka pasur përgjegjësi ose jo nga radhët e tyre.
Njoftimi i Policise se Shtetit:
Nisur nga aksidenti shumë i rëndë i ndodhur dje, në qytetin e Durrësit, si pasojë e të cilit humbën jetën 2 të mitur dhe u dëmtua një tjetër, Drejtori i Përgjithshëm i Policisë së Shtetit Drejtues Madhor Skender Hita, në zbatim të Rregullores së Policisë së Shtetit, ka pezulluar nga detyra, për performancë të dobët në përmbushjen e detyrave:
-Drejtorin e Drejtorisë Vendore të Policisë Durrës, Drejtues Afrim Tafa;
-Zëvendësdrejtorin për Rendin dhe Sigurinë Publike të DVP Durrës, Kryekomisar Zija Sulaj;
-Shefin e Sektorit të Policisë Rrugore të DVP Durrës, Kryekomisar Kreshnik Skëndo.
Gjithashtu, menjëherë pas ngjarjes, Drejtori i Përgjithshëm i Policisë së Shtetit urdhëroi Drejtorinë e Policisë Rrugore për të ngritur një grup ekspertësh të cilët shkuan në vendngjarje për të analizuar shkaqet dhe rrethanat e aksidentit.
Ndërkohë, Drejtoria e Standardeve Profesionale në Drejtorinë e Përgjithshme të Policisë së Shtetit ka nisur hetimin disiplinor për të vlerësuar nëse ka apo jo përgjegjësi në radhët e punonjësve të Policisë, për këtë rast.
