Të gjitha gjeneratat e reja të nxënësve duhet të edukohen të jetojnë bashkë në një shoqëri dhe një bashkësi, pasi ajo është përparësi dhe bazë e prosperitetit të përgjithshëm, nuk është diçka e padëshirueshme dhe rrezik për konflikt, ka porositur ministri i Arsimit dhe Shkencës, Arbër Ademi në manifestimin “Bashkë ndërtojmë ura” që sot u realizua në qytetin e Shkupit në bashkëpunim me OSBE-në, njofton MEDIAL.
“Fokusi kryesor në projektin janë nxënësit nga shkollat fillore dhe të mesme, arsimtarët dhe drejtuesit e saj të cilët organizojnë aktivitete të ndryshme përmes së cilës të rinjtë njoftohen me vlerat më të larta njerëzore, etike dhe morale për tolerancë dhe respekt ndaj dallimeve dhe respektimit të traditave kulturore dhe fetare të të tjerëve dhe traditës së bashkësive etnike”, ka thënë Ademi.
