Në Shutkë, në paraburgim kanë përfunduar tre deputetët e VMRO-së, të cilësuar si kryesorë në hapjen e dyerve për huliganët maqedonas natën e 27 prillit – Kërsto Mukovski, Sasho Vasilebvski dhe Luben Arnaudov, derisa paraburgim shtëpiak kanë marrë deputetët Johan Tarçullovski, Zhaklina Peshevska dhe Ljupço Dimovski. Kështu vendosi të martën Trupi gjyqësor i Gjykatës Penale të Shkupit, ndërkohë që gjatë tërë ditës, kishte marrë në pyetje gjashtë deputetët e VMRO-së, të akuzuar për “terrorizëm”, shkruan gazeta KOHA. Një deklaratë të shkurtër për mediat para hyrjes në gjykatë dje dha vetëm deputeti Mukovski, i cili tha se shikuar juridikisht, sipas tij, nuk ka argumente për paraburgim, por, siç theksoi, ia lë gjyqit që të vendosë për atë dhe beson në të. Ndryshe, gjashtë deputetët janë pjesë e 36 personave të cilët Prokuroria Themelore Publike i përndjek për “rrezikim terrorist të rendit kushtetues dhe të sigurisë” lidhur me ngjarjet e 27 prillit të këtij viti në Parlamentin e Republikës së Maqedonisë. Të premten, Parlamenti i Republikës së Maqedonisë ua hoqi imunitetin, ndërsa njoftimi në Gjykatën Penale nga Parlamenti arriti një ditë më parë, ku iu dorëzua gjykatësve kompetentë në procedurë paraprake, me çka u krijuan kushte që të veprohet rreth propozimit të prokurorisë.
