25 March
Më 31 mars banorët e rajoneve të përmbytura të cilët janë të vendosur në konviktin e studentëve “Tome Stefanovski Seniq” në Shkup duhet të lëshojnë konviktin dhe të vendosen diku tjetër. Ata thonë se nuk kanë se ku të kthehen, meqë shtëpitë e tyre janë në gjendje të pa banueshme dhe kërkojnë nga ministria e Punës dhe Politikës Sociale që tua vazhdojë afatin për qëndrim ose të gjej një zgjidhje tjetër afatgjate.
“Ka gjashtë muaj që kemi ardhur këtu. Asgjë nuk kemi ndërtuar ashtu si ka qenë, vetëm që janë hequr balta dhe mbeturinat. Ajo nuk bën as nëse ndërtohet, por e kemi patjetër ta rregullojmë atë, s’kemi ku të shkojmë tjetërkund”.
“Nuk kemi marrë asgjë, ndërsa ka shumë për të punuar, kemi marrë borxh tre herë dyshemenë e kemi rregulluar por prapë shtëpia është në gjendje alarmante, pas një kohe të shkurtë duhet të ndërtohet shtëpi e re pasi nuk e shoh që qëndron ajo shtëpi. Duhet të na vazhdohet patjetër afati deri në qershor se s’mundet, i shohim si janë punët. I kam afruar vetëm 30% të punëve sepse nuk kam pasur të holla, me hua i kam bërë”.
“E vetme jetoj. Gjithçka humba, rreth 15.000 euro ndërkaq vetëm 3000 kam marrë nga shteti”.
Drejtori i këtij konvikti Lulzim Xhemaili thotë se ka dërguar kërkesë deri në Ministrinë për Punë dhe politikë Sociale që të gjejnë një zgjidhje për këta banorë, por deri më tani nuk ka marrë asnjë përgjigje.
Ne kemi bërë kërkesa për këta banorë, kërkesave tona nuk i përgjigjet Ministria e Punës dhe Politikës Sociale . Nuk është qëllimi vetëm t’iu vazhdohet afati, por qëllimi është të merren masa konkrete për shtëpitë, të ju ndihmohet në mënyrë materiale. Do ta shqyrtojmë këtë çështje, do I shqyrtojmë të gjitha mundësitë, do kemi një bisedë edhe me banorët dhe do ju ofrojmë kushte sepse nuk mund t’i lëmë në rrugë sepse janë tatim pagues, janë banorë tonë, jemi pjesë e qeverisë dhe obligimi jonë është që t’i dalim popullit në ndihmë – deklaroi Lulzim Xhemaili, Drejtor I Konviktit Tome Stefanovski Senic.
Pavarësisht tentimeve të Alsat për të marrë qëndrim nga Ministria e Punës dhe politikës sociale nëse do shqyrtojë kërkesën e drejtorit të këtij konvikti dhe to ta vazhdojë afatin për qëndrimin e banorëve edhe më tej, ata nuk ishin të kapshëm për të dhënë një përgjigje. Në konviktin “Tome Stefanovski Senic” në Shkup për momentin janë të vendosur 79 banor. Në gushtin e vitit të kaluar kur ndodhën përmbytjet në Shkup, numri i banorëve të vendosur në këtë konvikt ishte 250.
Vjollca Aliti