Pas arratisjes së të burgosurit Altin Ndoci, ministri i Drejtësisë ka thirrur sot një takim të posaçëm me drejtuesit e të gjitha Institucioneve të Ekzekutimit të Vendimeve Penale (IEVP) në vend, duke kërkuar masa të menjëhershme për forcimin e sigurisë në sistemin e burgjeve.
Ministri bëri të ditur se, pas shkarkimit të drejtorit të IEVP Durrës dhe pezullimit të menjëhershëm të gjithë zinxhirit përgjegjës pas ngjarjes së rëndë, ka kërkuar ndërhyrje urgjente për rritjen e kontrollit, forcimin e masave të sigurisë dhe parandalimin e futjes së sendeve të paligjshme në institucionet e vuajtjes së dënimit.
Gjithashtu, ai i ka kërkuar Drejtorisë së Përgjithshme të Burgjeve të kryejë një vlerësim të plotë të parametrave të sigurisë dhe rishpërndarjes në IEVP Durrës, duke konsideruar transferimin e të dënuarve apo paraburgosurve me rrezikshmëri të lartë në burgje të sigurisë së lartë.
Ministri i Drejtësisë ka urdhëruar gjithashtu Shërbimin e Kontrollit të Brendshëm në Sistemin e Burgjeve që të shpeshtojë kontrollet në të gjitha IEVP-të e vendit, me qëllim parandalimin e çdo tentative që mund të cënojë sigurinë.
Deklarata e Ministrit të Drejtësisë, Besfort Lamallari:
Thirra sot një takim të posaçëm me drejtuesit e të gjitha Institucioneve të Ekzekutimit të Vendimeve Penale në vend. Pas shkarkimit të drejtorit të IEVP Durrës pas ngjarjes së rëndë dhe pezullimit të menjëhershëm të të gjithë zinxhirit përgjegjës, kam kërkuar masa urgjente për forcimin e kontrollit, rritjen e sigurisë dhe parandalimin e futjes së sendeve të paligjshme nëpër burgje.
Kërkova nga Drejtoria e Përgjithshme e Burgjeve të bëjë një vlerësim të parametrave të sigurisë dhe rishpërndarjes së IEVP Durrës, duke konsideruar transferimin e të dënuarve apo paraburgosurve me rrezikshmëri në burgje të sigurisë së lartë.
Kam urdhëruar Shërbimin e Kontrollit të Brendshëm në Sistemin e Burgjeve të shpeshtojë kontrollet në të gjitha IEVP-të e vendit, për të parandaluar çdo tentativë të mundshme për cënim të sigurisë.
Siguria në burgje është një prioritet absolut dhe nuk do të tolerohet asnjë formë neglizhence apo shkeljeje e procedurave standarde.
Çdo tentativë për të sfiduar rendin, sigurinë dhe autoritetin e ligjit nëpër burgje cënon gjithashtu sigurinë publike, besimin dhe bashkëpunimin me agjenicitë ligjzbatuese dhe institucionet e drejtësisë. Në çdo rast përgjegjësit do të përballen ligjërisht pa kompromis dhe pa humbur kohë me pasojat e veprimeve të tyre.
