Gjykata e Posaçme ka shpallur fajtorë dhe dënuar 2 persona të pandehur për akuzën e korrupsionit zgjedhor aktiv dhe pasiv.
Vendimi u dha ditën e sotme (13 janar), për Pandeli Bozha dhe Vladimir Lushka, por ky dënim u konvertua në fund nga GJKKO në shërbim prove dhe shuarje.
Prokuroria e Posaçme kishte nisur hetimet prej vitit të kaluar, duke e dërguar dosjen në gjyq.
Gjykimi i kësaj ҫështje u zhvillua me rregullat e gjykimit të shkurtuar. Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtarët Etleva Deda, Irena Gjoka dhe Bib Ndreca.
Bozha u dënua me 1,5 vite burg, po për shkak të gjykimit të shkurtuar u bë 1 vit dhe si përfundim u kthye në shërbim prove. Fajtor u shpall edhe Lushka, por sipas GJKKO ky dënim shuhej, pa përcaktuar masën e tij.
Në fund u bë edhe sekuestrimi i provës materiale për llogari të shtetit, që ishte një kartmonedhë 2 mijë lekëshe që do përdorej për blerjen e votës.
Historiku i ngjarjes gjatë zgjedhjeve të 11 majit, kush është Pandeli Bozha
Pandeli Bozha është babai i kandidates së PSD-së, Limonera Bozha, i cili u arrestua me urdhër të SPAK nga Policia për blerjen e votave për llogari të saj vitin e kaluar, për zgjedhjet e 11 majit.
GJKKO kishte vendosur masën arrest shtëpiak ndaj tij, pasi u përfshi në blerje votash në qytetin e Fierit. Ndërkohë gjatë daljes së saj nga GJKKO, Limonera Bozha është shprehur se nuk kanë kurrë të përfshirë në gjëra të tilla. GJKKO ka vendosur arrestin shtëpiak për shkak të gjendjes jo të mirë shëndetësore dhe moshës së tij, kurse sot dha vendimin me një vit burg, që e pezulloi dhe e ktheu në shërbim prove.
Ndërkohë, sipas prokurorisë Bozha mësohet se ka përdorur kontakte personale dhe mjete financiare duke ndikuar kështu të njerëzit për të votuar. Pandeli Bozha, babai i kandidates së PSD në Fier, Limonera Bozha, është ndaluar me urdhër të SPAK në 8 maj, nën dyshimin për korrupsion aktiv në zgjedhje.
Kurse Vladimir Lushka ishte personi që ishte paguar për votën.
Vendimi i plotë i GJKKO-së:
“Prokuroria e Posaçme kundër Korrupsionit dhe Krimit të Organizuar ka paraqitur pranë Gjykatës kërkesën me objekt: “Gjykimin e çështjes penale që i përket procedimit penal nr. 60/1, të vitit 2025, në ngarkim të të pandehurve: Pandeli Bozha, i akuzuar për kryerjen e veprës penale “Korrupsion aktiv në zgjedhje”, parashikuar nga neni 328 i Kodit Penal dhe Vladimir Lushkaj, i akuzuar për kryerjen e veprës penale “Korrupsion pasiv në zgjedhje”, parashikuar nga neni 328/b i Kodit Penal”.
- Gjykimi i kësaj ҫështje u zhvillua me rregullat e gjykimit të shkurtuar. Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtarët Etleva Deda, Irena Gjoka dhe Bib Ndreca, me vendimin nr. 1, datë 13.01.2026 vendosi:
1.Deklarimin fajtor të të pandehurit Pandeli Bozha për kryerjen e veprës penale “Korrupsioni aktiv në zgjedhje”, parashikuar nga neni 328 i Kodit Penal dhe dënimin e tij me 1 (një) vit e 6 (gjashtë) muaj burgim.
-Në aplikim të nenit 406, kësaj mase dënimi i ulet 1/3 e dënimit dhe përfundimisht dënimin e tij me 1 vit (një) burgim.
-Në aplikim të nenit 59 të Kodit Penal pezullimin e ekzekutimit të vendimit me burgim dhe vënien në provë të të dënuarit, me kusht që gjatë kohës së provës të mos kryejë vepër penale tjetër, për një periudhë prej 24 muaj.
- Deklarimin fajtor të pandehurit Vladimir Lushkaj për kryerjen veprës penale “Korrupsion pasiv në zgjedhje”, parashikuar nga neni 328/b i Kodit Penal.
-Në bazë të nenit 52/b të Kodit Penal, përjashtimin nga dënimi të të pandehurit Vladimir Lushkaj.
- Lidhur me provat materiale, Gjykata disponon si më poshtë:
një kartmonedhë në shumën 2000 lekë duke qenë se ajo është shpërblim i dhënë për veprën penale, konform nenit 36/1/c të Kodit Penal, të kalojë në favor të shtetit.
– një fletë e ngjashme si ato të fletëve të votimit ku emri i kandidates për deputete L.B ishte i ngjyrosur me ngjyrë portokalli, të bëhet pjesë e fashikullit të gjykimit.
- Shpenzimet procedurale të kryera gjatë fazës së hetimit paraprak në shumën 6,361.52 (gjashtë mijë e treqind e gjashtëdhjetë e një pikë pesëdhjetë e dy) lekë, seancës paraprake dhe gjatë gjykimit, sipas procesverbalit bashkëlidhur këtij vendimi, i ngarkohet të pandehurve solidarisht.
- Kundër këtij vendimi lejohet apel brenda afatit ligjor, në Gjykatën e Posaçme të Apelit për Korrupsionin dhe Krimin e Organizuar”.
