Shumica e kryetarëve të komunave në Maqedoninë e Veriut kanë dorëzuar fletët e anketimit në Komisionin Shtetëror për Parandalimin e Korrupsionit, por vetëm një pjesë e vogël ka publikuar pagat neto.
Sipas të dhënave të raportuara dhe të deklaruara, paga më e ulët e publikuar është ajo e Sashko Mitovskit, kryetar i Kriva Pallankës, me 56.371 denarë (rreth 915 euro).
Në krye të listës qëndron Ejup Abazi nga Studeniçani me 102.000 denarë (rreth 1.654 euro). Pasojnë Risto Mançev nga Bosilova me 95.520 denarë (rreth 1.550 euro), Mirosllav Slavkovski nga Staro Nagoriçani me 91.256 denarë (rreth 1.480 euro), Gjorge Bozhinov nga Novo Sella me 90.121 denarë (rreth 1.462 euro) dhe Viktor Paunov nga Karbinci me 86.300 denarë (rreth 1.400 euro). Vanço Mitev nga Zrnovca ka deklaruar 58.000 denarë, që përkthehet në rreth 940 euro.
Pagat e kryetarëve llogariten përmes një koeficienti të përcaktuar me ligj, i cili shumëzohet me pagën mesatare neto të vitit paraprak. Koeficientët variojnë nga 2.70 për komunat më të vogla deri në 3.40 për komunat me mbi 50.000 banorë, çka e bën pagën e kryetarit të ndjeshme ndaj madhësisë së komunës dhe nivelit mesatar të të ardhurave në vend.
