Shtetet e Bashkuara dhe Ukraina kanë përgatitur një “kornizë të përditësuar dhe të rafinuar paqeje” dhe pritet të vijojnë punën “intensive” për një plan të plotë gjatë ditëve në vijim, njoftuan të dy vendet të dielën, raporton BBC.
Në një deklaratë të përbashkët thuhet se bisedimet në Gjenevë mbi planin e mbështetur nga SHBA-të kanë qenë “shumë produktive”.
Sekretari amerikan i Shtetit, Marco Rubio, deklaroi se është bërë “një përparim i jashtëzakonshëm” në përmirësimin e një plani që është pritur me kujdes nga Moska, por jo nga udhëheqësit në Kiev dhe kryeqytetet evropiane, të cilët e konsiderojnë atë shumë të favorshëm për Kremlinin.
Rubio theksoi se “ende ka punë për të bërë”, ndërsa Presidenti ukrainas Volodymyr Zelensky u shpreh se po vijnë “sinjale se ekipi i Presidentit Donald Trump po na dëgjon”. Duke folur për gazetarët mbrëmjen e së dielës, Rubio tha se ekipet negociatore në Gjenevë kishin pasur “një ditë shumë të mirë”.
Sipas tij, qëllimi kryesor ishte ngushtimi i “çështjeve të hapura” nga plani 28-pikësh i SHBA-ve dhe se palët kishin arritur progres “të konsiderueshëm”.
Megjithatë, diplomati i lartë amerikan theksoi se çdo marrëveshje përfundimtare duhet të miratohet nga presidentët e SHBA-ve dhe Ukrainës përpara se t’i prezantohet Rusisë, ndërsa disa çështje mbeten ende në negocim.
Deklaratat optimiste vijnë vetëm pak orë pasi Presidenti Trump akuzoi udhëheqësit ukrainas për “mungesë të plotë mirënjohjeje” ndaj përpjekjeve të SHBA-ve për t’i dhënë fund luftës në Ukrainë.
Presidenti amerikan kritikoi gjithashtu Evropën, e cila është ndër aleatët më të ngushtë të Kievit, për faktin se vazhdon të blejë naftë nga Rusia. Moska mbështetet fort te eksportet e saj të energjisë për të financuar luftën.
