Kantautori i mirënjohur Pirro Çako ka reaguar pasi nëna e tij dhe sopranoja e famshme Luiza Çako u nda nga jeta në moshën 88-vjeçare.
Pirro Çako zgjodhi një foto të fëmijërisë teksa e ëma e mbante në krah për t’i dhënë lamtumirën e fundit.
“Lamtumirë Nëna ime ️♥️”, shkroi artisti i njohur krahas imazhit në një postim në rrjetin social Instagram.
Kush ishte Luiza Çako
Sopranoja e njohur Luiza Çako (Papa) ka ndërruar jetë duke lënë pas një trashëgimi të çmuar në skenën shqiptare.
Luiza Çako ka pasur një karrierë të gjatë dhe të pasur në muzikën klasike, ku është vlerësuar për zërin e saj të veçantë dhe interpretimet me ndjeshmëri të lartë artistike.
Ajo ka interpretuar në një sërë veprash të repertorit operistik shqiptar dhe ndërkombëtar, duke lënë gjurmë në kulturën tonë.
Ajo ishte bashkëshortja e të ndjerit Gaqo Çako, një prej ikonave të operës shqiptare, dhe nëna e kantautorit të njohur Piro Çako, i cili ka ndjekur gjurmët e prindërve të tij në muzikë, duke ndërtuar një karrierë të suksesshme në muzikën moderne shqiptare.
E ëma e kantautorit të njohur Pirro Çakos, Luiza Papa ka qenë një nga femrat më të bukura shqiptare të viteve ’60. Luizën e përshkruajnë si vajzën që të gjithë kthenin kokën kur ajo kalonte. Ishte e bukur por dhe me shumë stil në të veshur aq sa femrat e Tiranës e kopjonin.
Gruaja me emrin Luiza Papa shquhej për veshje të veçanta tërë elegancë, për stilin e saj perëndimor dhe për topuzin e famshëm që gjithnjë e ka pasur të veçantë dhe i jepte hir mbretëreshe. Dhe përveç kësaj kishte një trup të skalitur qe te gjithe e krahasonin me Sophia Loren dhe një fytyrë të harmonishme dhe mrekullisht të bukur si një divë kinemaje.
Pas fejesës më Gaqo Çakon ajo filloi të bëhej më fanatike për veshjen. Duke qenë se fati e kishte lidhur me një emër të lakmuar të botës muzikore, një prej tenorëve më të mirë shqiptarë ajo filloi të ishte më e kujdesshme për pamjen e saj të jashtme.
Trend i asaj kohe ishte një tualet i thjeshtë dhe një e veçantë që ajo e kish ruajtur gjithmonë: flokët topuz. Një model flokësh që gjithnjë i ka dhënë pamje mbretërore dhe aristokratike.
Mjeshtri i madh i muzikës, Gaqo Çako ndërroi jetë në banesën e tij në Tiranë mbrëmjen e 1 gushtit 2018 në moshën 83-vjeçare.
