Migrimi masiv i familjeve nga zonat rurale drejt qytetit dhe jashtë vendit po shkakton pasoja të rënda për shkollat periferike në rajonin e Tetovës. Në fshatin Bozofcë, për herë të parë këtë vit shkollor, nuk ka asnjë nxënës të regjistruar në klasën e parë, duke e lënë shkollën e fshatit tërësisht të mbyllur, përcjell INA.
Situata nuk është më e mirë as në fshatin Veshallë, ku shkolla “Besa” gjithashtu nuk ka asnjë nxënës të regjistruar në klasën e parë, ndonëse vitin e kaluar aty mësimin e nisën 12 fëmijë.
Në shkollat e Tetovës, këtë vit janë regjistruar gjithsej 930 nxënës të klasës së parë, që përbën një rënie prej 123 nxënësish krahasuar me vitin shkollor të kaluar.
Kjo tregon një trend të qartë të zvogëlimit të popullsisë shkollore, sidomos në vendbanimet më të vogla dhe të largëta. Komuna e Tetovës dhe drejtuesit e institucioneve arsimore kanë konfirmuar se numri i fëmijëve që largohen bashkë me familjet e tyre drejt vendeve perëndimore po rritet çdo vit. Vetëm në gjysmën e parë të vitit shkollor të kaluar, nga komunat e Tetovës dhe Gostivarit janë lëshuar mbi 350 fletë‑shpërnguljeje për nxënës, një pjesë e madhe e të cilëve janë larguar drejt Gjermanisë, Zvicrës dhe vendeve të tjera evropiane.
Këto zhvillime po e çojnë drejt boshatisjes jo vetëm shkollat rurale, por edhe vetë komunitetet që dikur ishin të gjalla dhe të populluara. Në shumë raste, në shkolla rurale të Tetovës janë regjistruar vetëm 2 apo 3 nxënës, duke e bërë të pamundur organizimin normal të mësimit. Zyrtarët e Komunës së Tetovës pranojnë se problemi është kompleks dhe kërkon një qasje të re, përfshirë riorganizimin e rrjetit shkollor, mbështetje për mësuesit dhe përpjekje për të frenuar shpërnguljen.
Ndërkohë, për familjet që kanë mbetur në këto fshatra, arsimi i fëmijëve po bëhet gjithnjë e më i vështirë. Prindërit detyrohen t’i dërgojnë fëmijët në shkolla më të largëta, me transport të kufizuar dhe kushte jo të favorshme. Në këtë situatë, fëmijët që jetojnë në zona rurale jo vetëm që kanë më pak mundësi arsimimi, por edhe përballen me izolim dhe mungesë motivimi. Migrimi vazhdon të zbrazë shkollat, fshatrat dhe zemrat e atyre që ende jetojnë në vendlindje, duke ngritur shqetësime serioze për të ardhmen demografike dhe arsimore të rajonit.(INA)
