Duke komentuar paralajmërimet e Ahmetit se mund të dalë në rrugë të protestojë, kryeministri Hristijan Mickoski bëri thirrje liderit të BDI-së që të mos jetojë në të kaluarën, por të shikojë nga e ardhmja. Mickoski e këshilloi Ahmetin që fillimisht të hedhë një sy drejt milionerëve që e rrethojnë dhe që janë pasuruar në kurriz të qytetarëve, e më pas të përpiqet të ristrukturojë partinë e tij, në vend që të kërcënojë.
“Për fat të keq, duket se zoti Ahmeti ende jeton në të kaluarën, sepse nëse do të jetonte në të tashmen, do të mund të bënte një dallim të madh material midis të kaluarës dhe njerëzve të të kaluarës dhe të tashmes, në të cilën ai është në opozitë, dhe rreth tij ka shumë milionerë që janë pasuruar në kurriz të qytetarëve të Maqedonisë. Dhe kjo është arsyeja kryesore pse ai është në opozitë. Mendoj se nëse është i mençur, siç e paraqet veten, do të nxjerrë mësim dhe në vend që të kërcënohet, do të bëjë reforma strukturore, programore dhe kadrovike në partinë e tij. Dhe me fytyra të reja, me një program të ri, do të dalë para qytetarëve të Maqedonisë për të kërkuar besimin e tyre”, tha Hristijan Mickoski – Kryeministër.
Ahmeti njoftoi se BDI-ja mund të organizojë protesta masive për mbështetjen dhe lirimin e Kreshnik Bekteshit, i cili ndodhet në paraburgim si pjesë e hetimit për zjarrin në Koçan, ku humbën jetën 62 persona. Kjo nuk është hera e parë që Ahmeti kërcënon me protesta në rrugë. Kërcënimet lëshoi edhe verën e kaluar, kur me arsyetimin se qeveria është e paligjshme, ai paralajmëroi se do të shprehte revoltën e tij në rrugë. Prej disa muajsh, policia është në kërkim të bashkëpunëtorit më të ngushtë të Ahmetit, Artan Grubi, i cili është në listën e zezë amerikane për korrupsion. Përveç Grubit, po kërkohet edhe një tjetër anëtar i BDI-së, Përparim Bajrami, i cili gjithashtu është në arrati dhe dyshohet për shpërdorime me tenderët në Lotarinë shtetërore në kohën kur ishte drejtor. Ndërkohë në listë të zezë të SHBA-ve është edhe kreu aktual i Komunës së Strugës Ramiz Merko, të cilin Ahmeti shqyrton ta kandidojë edhe për një mandat në Strugë./Alsat.mk
