Sot në Shkup u mbajt panel me temën “Kornizat gjeopolitike, diplomatike dhe juridike të bashkëpunimit rajonal në Ballkan”, në të cilën mori pjesë ish-ministri i Jashtëm i Türkiyes dhe deputeti Mevlüt Çavuşoğlu, raporton Anadolu.
Në panelin e organizuar nga Qendra e Kërkimeve Ballkanike dhe Klinika Juridike në Universitetin Ndërkombëtar Ballkanik (IBU) morën pjesë edhe ministri për Çështje Evropiane i Maqedonisë së Veriut, Orhan Murtezani, ambasadori i Türkiyes në Shkup, Fatih Ulusoy, profesorë, përfaqësues të institucioneve turke në vend dhe studentë.
Duke folur në panelin e moderuar nga koordinatori i Qendrës së Kërkimeve Ballkanike Flamur Ismaili, rektori i IBU-së Lütfi Sunar falënderoi pjesëmarrësit dhe tha se paneli do të jetë në cilësinë e një leksioni të zbatuar.
Ndërkaq, Çavuşoğlu, njëherësh shef i Delegacionit Turk në Asamblenë Parlamentare të NATO-s, theksoi se është i lumtur që gjendet në Shkup dhe vuri në dukje se IBU-ja ka qenë ndër universitetet më të rëndësishme dhe prestigjioze në rajon që nga dita e themelimit.
Ai theksoi se përfshirja e fuqive në rritje në sistem është e rëndësishme për rendin botëror, duke shtuar se “Megjithëse Türkiye është brenda organizatave perëndimore, ajo është zëdhënësja kryesore e jugut global”.
Çavuşoğlu tha se sistemi i dominuar nga Perëndimi nuk po funksionon dhe se efektet negative të tij po shihen.
– “Duam që Ballkani të jetojë në paqe dhe qetësi”
Duke theksuar se në Ballkan ka pasur një paqe të brishtë, Çavuşoğlu tha se “Ballkani ka qenë qendra e luftës për pushtet dhe ndikim gjatë historisë”.
Çavuşoğlu vuri në dukje se Türkiye ka qenë ndërmjetësuese dhe lehtësuese në luftën në Ukrainë dhe tha se nuk mund të ketë paqe pa një armëpushim.
Ai po ashtu nënvizoi se nuk duan që Ballkani të bëhet një zonë rivaliteti dhe ndikimi, duke shtuar se stabiliteti dhe siguria e Ballkanit janë jashtëzakonisht të rëndësishme për Türkiyen dhe Evropën.
“Si Türkiye, ne duam që Ballkani të jetojë në paqe dhe qetësi, pa ndërhyrë në punët e brendshme të Ballkanit. Duam të zhvillojmë marrëdhëniet me të gjitha vendet ballkanike, pa bërë dallim, në çdo fushë”, deklaroi ish-ministri i Jashtëm i Türkiyes.
Duke thënë se fusha e diplomacisë po zhvillohet gradualisht, Çavuşoğlu theksoi se nevoja për diplomaci nuk ka ndryshuar.
