Ministri i Shëndetësisë Arben Taravari ka konfirmuar se ka edhe një viktimë nga tragjedia në Koçan. I ndjeri, i cili po trajtohej në Lituani, kishte 40 përqind djegie dhe më 1 prill, veshkat i kishin pushuar së funksionuari. Sipas informacioneve fillestare bëhet fjalë për Aleksandar Karadakoski, menaxher i diskotekës “Pulse”, raporton SHENJA.
Ky pacient ishte një nga katër pacientët që ishin në gjendje kritike.
“Prej 1 prillit i kanë pushuar së funksionuari veshkat, praktikisht është vënë në dializë. Fatkeqësisht sot në mëngjes mora lajmin e keq se ai kishte ndërruar jetë. Le të shpresojmë që të tjerët që janë në gjendje kritike tu përmirësohet situata. Pacienti që vdiq kishte djegie në 40 përqind të trupit. Në fund, problemi kryesor ishte infeksioni që mori për shkak të sipërfaqes së madhe të plagëve që ishin në trup. Të shpresojmë që të tjerët në gjendje kritike të ecin më mirë dhe të kthehen në vendin tonë”, tha Taravari.
Burime nga MPJ për MIA-në bëjnë të ditur se ka filluar procedura për kthimin e trupit të pacientit.
Kjo është viktima e 60-të nga zjarri në diskotekën e Koçanit që ka ndodhur herët në mëngjes më 16 mars.
