Pothuajse 83,000 punonjës në Maqedoni ende nuk e kanë marrë pagën e janarit, një shifër 3.5 herë më e lartë krahasuar me të njëjtën periudhë të vitit të kaluar, tregojnë të dhënat e Drejtorisë së të Ardhurave Publike (DAP), raporton “Sitel”.
Sipas detyrimeve ligjore, afati për pagesën e pagave të janarit ishte 14 shkurti, dhe deri në këtë datë, mbi 70,000 kompani duhej të kryenin pagesat për gjithsej 551,264 punëtorë.
DAP njofton se kompanitë që nuk e kanë respektuar afatin tashmë kanë marrë paralajmërime dhe, nëse nuk e bëjnë pagesën në periudhën e ardhshme, ndaj tyre do të ndërmerren masa për shlyerje të detyruar.
“Kompanitë që nuk respektojnë afatet ligjore për pagesën e pagave do të përballen me masa përkatëse, përfshirë edhe shlyerjen e detyruar,” thuhet në njoftimin e Drejtorisë.
Në të njëjtën periudhë të vitit të kaluar, pa pagë kishin mbetur rreth 25,000 punonjës, që do të thotë se këtë vit numri është rritur ndjeshëm.
Nuk janë dhënë ende arsye të sakta për këtë rritje drastike, por ekspertët theksojnë pasigurinë ekonomike, kostot e larta për bizneset dhe borxhet si faktorë të mundshëm që kanë ndikuar në vonesën e pagave.
