Delegacioni i Këshillit Koordinues të Diasporës, i kryesuar nga kryetari Mark Gjonaj dhe biznesmeni i mirënjohur Lazim Destani, kanë realizuar një vizitë të rëndësishme në Komunën e Tetovës.
Këshilli ka njoftuar se gjatë kësaj vizite, delegacioni zhvilloi një takim konstruktiv me kryetarin e Komunës, Bilall Kasami.
Ky takim shënoi një moment të veçantë bashkëpunimi, ku u diskutua për mundësitë e angazhimit të diasporës në projekte zhvillimore dhe forcimin e lidhjeve midis Tetovës dhe bashkëkombësve tanë jashtë vendit.
“Gjatë këtij takimi, u diskutuan çështje të rëndësishme që lidhen me bashkëpunimin midis diasporës shqiptare dhe Komunës së Tetovës. Qëllimi kryesor ishte fuqizimi i lidhjeve tona dhe realizimi i projekteve të përbashkëta që sjellin zhvillim dhe përfitime për qytetarët”.
“Kryetari Gjonaj dhe Destani theksuan rëndësinë e rolit të diasporës shqiptare në mbështetjen e iniciativave që përmirësojnë mirëqenien e komunitetit. Nga ana tjetër, kryetari Kasami shprehu mirënjohje dhe gatishmëri për të intensifikuar bashkëpunimin në të ardhmen”, thuhet nw njoftim.
I pari i Komunës së Tetovës Kasami tha se “Është nder i madh të mirë presim përfaqësuesit e diasporës sonë. Kontributi juaj është i pazëvendësueshëm përzhvillimin tonë shoqëror dhe ekonomik. Së bashku, mund të bëjmë më shumë për Tetovën!”
Poashtu , Delegacioni i Këshillit Koordinues të Diasporës (KKD), i përfaqësuar nga kryetari Mark Gjonaj dhe anëtari i shquar Lazim Destani, mori pjesë në ceremoninë e organizuar me rastin e 30-vjetorit të themelimit të Universitetit të Tetovës. Ky event solemn shënoi një moment të rëndësishëm për arsimin dhe kulturën shqiptare në Maqedoninë e Veriut.
Në fjalën e tyre përshëndetëse, përfaqësuesit e KKD-së theksuan rëndësinë historike dhe rolin që Universiteti i Tetovës ka luajtur në avancimin e arsimit të lartë dhe forcimin e identitetit kombëtar të shqiptarëve. Lazim Destani, si një mbështetës i kahershëm i arsimit dhe i këtij universiteti, përgëzoi udhëheqësit e institucionit për arritjet gjatë këtyre tri dekadave.
Gjonaj vlerësoi kontributin e diasporës në përkrahjen e institucioneve arsimore dhe përmendi nevojën për të vazhduar këtë bashkëpunim të ndërsjellë për të mbështetur brezat e rinj. Ai theksoi se Universiteti i Tetovës mbetet një shembull frymëzues i përkushtimit dhe sakrificës për të siguruar arsim cilësor për të gjithë.
Kjo pjesëmarrje simbolizon angazhimin e diasporës shqiptare për të mbështetur dhe promovuar arsimin dhe zhvillimin shoqëror në vendlindje./Zëri
