Detaje të reja janë zbuluar lidhur me atentatin mafioz ndaj Klajdi Prendit, djalit të ish-gjyqtarit, Fran Prendit, i cili u ekzekutua pak pas mesnate teksa po hynte në makinën e tij në zonën e Xhamllikut në Tiranë.
Gazetari Igli Çelmeta raporton se dyshohet që në atentat të kenë marrë pjesë 3 persona, ku njëri supozohet se ka qenë shofer dhe dy të tjerët ekzekutorët.
Sakaq, mësohet se viktima ka pasur precedentë të mëparshëm penal, pasi në zgjedhjet e fundit është shpallur në kërkim për shkak se qëlloi në ajër me armë zjarri në Pukë.
Policia në informacionin zyrtar paraprak sqaron se Prendi, rreth 30 vjeç u qëllua me armë zjarri. I riu u transportua për në spital, por si pasojë e plagëve të marra ka ndërruar jetë.
Ndërkohë rreth orës 01:05, në afërsi të Liqenit të Farkës është konstatuar duke u djegur një mjet tip “Audi”, që dyshohet se i përket autorëve të ngjarjes.
DINAMIKA
Pak pas mesnate (19 nëntor) autorë ende të paidentifikuar qëlluan me armë zjarri me silenciator në drejtim të të riut, Klajdi Prendi.
Mësohet se 30-vjeçari është mbajtur nën vëzhgim dhe monitorim nga autorët, të cilët kanë pritur momentin kur i riu është futur në automjetin e tij G-Class.
Sapo viktima është futur në makinë e kanë qëlluar me armë zjarri me silenciator. Drejt tij është qëlluar me 5 plumba.
30-vjeçari Prendi u transportua në spital në gjendje të rëndë për jetën, por si pasojë e plagëve të marra ai ka ndërruar jetë.
Policia ka sekuestruar pamjet e kamerave të sigurisë në bizneset dhe objektet pranë vendit të ngjarjes dhe po punon për zbardhjen e rrethanave dhe identifikimin e autorëve.
Rreth 1 orë pas ngjarjes, një automjet me targa të huaja u gjet i djegur në zonën e Farkës. Dyshohet se makina i përket autorëve të atentatit ndaj 30-vjeçarit.
Ndërkohë policia dhe grupi hetimor po punojnë për zbardhjen e rrethanave të këtij atentati si dhe identifikimin dhe kapjen e autorëve.
