Në urgjencën e Bulqizës janë shtuar numri i qytetarëve, në këto 3 ditët e fundit, që shtrohen aty për të marrë mjekime lidhur me simptomat e helmimit.
Qytetarë të moshave të ndryshme nga zona të ndryshme të Bulqizës janë paraqitur në urgjencën e spitalit bashkiak për të marrë ndihmë mjekësore pasi janë paraqitur me dhimbje barku, të vjella, temperaturë e diarre.
Fillimisht u dyshua për një kontaminim i ujit të pijshëm, por kjo u hodh poshtë për shkak të shpërndarjes gjeografike të rasteve.
Mjeku pranë urgjencës së spitalit të Bulqizës Shahin Kaja thotë se kjo mund të jetë një situatë virusale pasi rastet janë të shpërndara dhe nuk kanë lidhje me përdorimin e të njëjtit rrjet të ujit të pijshëm.
Po ashtu, përjashtohet edhe mundësia e helmimit nga ushqimi në ndonjë rast gëzimi familjar pasi rastet janë të vazhdueshme prej të paktën tri ditësh.
Fluksi vijon të jetë i lartë edhe gjatë kësaj të hëne ku deri tani janë paraqitur mbi 10 persona.