Drejtori i përgjithshëm dhe kryetari i Bordit të drejtorëve të “Alkaloid”, Zhivko Mukaetov, mori pjesë në konferencën “Rojtarët e urtësisë”, që për herë të dytë mbahet në organizimin e “Halk Bank” SHA Shkup, nën moton “Frymëzim për brezin e ri”.
Në kuadër të panelit të dytë të konferencës, me titull “Historia e suksesshme e biznesit – përkushtim, disiplinë, intuitë”, moderuar nga Sashko Kocev, dhe në shoqërinë e bashkëpanelistit Petar Ninovski, themelues i “Brainster”, përmes një diskutimi të këndshëm dhe të drejtpërdrejtë, Mukaetov trajtoi përvojat e tij dhe sfidat e tij personale dhe profesionaqle gjatë karrierës së tij 25 vjeçare.
“Për mua si person që drejtoj ‘Alkaloid’ sfida më e madhe ishte fillimi i kapitullit të menaxhimit. Në moshën 32-vjeçare erdha në krye të një sistemi të madh me traditë të gjatë dhe peshë specifike. Shumë njerëz e kishin të rezervuar besimin dhe mbizotëruan pritshmëritë se “kohët më të mira” për “Alkaloid” kishin kaluar. 18 vjet më vonë, rezultati i punës jashtëzakonisht të përkushtuar është se tani mund të them kemi të bëjmë me një kompani globale, e pranishme në të gjitha kontinentet, në më shumë se 50 vende të botës, me rritje dhe zhvillim të vazhdueshëm dhe më shumë se pesëfishim të shitjeve në periudhën e kaluar. Një kompani që tregon dhe dëshmon se edhe në Maqedoni mund të bëjmë shumë gjëra në mënyrën e duhur dhe se jemi në gjendje dhe konkurruese të pozicionohemi kudo në botë”, theksoi Mukaetov.
Një pjesë e madhe e panelit iu kushtua burimeve njerëzore, pra sfidave me të cilat përballen të rinjtë në fillimet e karrierës së tyre në drejtim të zgjedhjes së rrugës së tyre profesionale në shtet apo në sektorin privat, por edhe sfidat me të cilat përballen kompanitë në kushtet e gjetjes së stafit cilësor dhe profesional.
“Në vendin tonë një pjesë e madhe e të rinjve besojnë se do të mund ta realizojnë veten më së miri përmes publikut, pra sektorit shtetëror. Unë do të rekomandoja akoma sektorin privat, ku kushdo që guxon, që meriton një shans, do ta marrë në mënyrë të pashmangshme. Të gjitha kompanitë kanë nevojë për staf cilësor dhe të përkushtuar me vlerat e duhura. Ne në ‘Alkaloid’ luftojmë për të sjellë dhe mbajtur njerëz të tillë, përmes programeve të praktikës, edukimit të dyfishtë, ndjekjes së karrierës dhe trajnimeve dhe aktiviteteve të ndryshme të brendshme. Është shumë e rëndësishme si shoqëri të ndërtojmë një klimë në të cilën zgjedhja e parë profesionale e të rinjve do të ishte sektori privat në çdo formë: qoftë si pjesë e kompanive të mëdha, përmes iniciativës së tyre biznesore, start-up etj”, theksoi Mukaetov.
Themeluesi i “Brainster”, Petar Ninovski, në fjalimin e tij para studentëve dhe ndërmarrësve të rinj, theksoi se të rinjtë nuk duhet të “shpëtojnë veten” në 15 vitet e para të karrierës së tyre, por “duhet të punojnë shumë, të mundohen, nëse duhet dhe të bëjnë gabime në biznes, por të jenë në gjendje të falin veten për to”.
Ninovski, si drejtues i një kompanie që përmes projekteve reale ofron zgjidhje aplikative që do t’i tejkalojnë sfidat e kohës moderne, hapi temën e inteligjencës artificiale në industrinë farmaceutike, për të cilën Mukaetov theksoi: “Në industrinë farmaceutike trendet ndryshojnë shumë shpejt dhe nëse duam të mbetemi konkurrues duhet t’i ndjekim ato. Si kompani, ne tashmë përdorim të dhëna dhe simulime nga baza të ndryshme të të dhënave të AI që na shërbejnë si argumente shtesë kur marrim vendime në drejtim të hyrjes në tregje të reja, zhvillimit të produkteve të reja etj.”
Qëllimi i konferencës “Rojtarët e urtësisë” e organizuar nga “Halk Bank” SHA Shkup është të bashkojë studentët dhe ndërmarrësit e rinj me mentorët dhe praktikuesit më të mirë nga fusha të ndryshme profesionale dhe mundësinë për të dëgjuar histori suksesi të dorës së parë dhe për të mësuar gjëra të dobishme nga përvojat e njerëzve që me punën dhe përkushtimin e tyre arritën të kapërcejnë të gjitha barrierat dhe të arrijnë majat e karrierës së tyre.