Presidenti Stevo Pendarovski sot priti presidentin e Republikës së Shqipërisë, Ilir Meta, i cili po qëndron për vizitë në Republikën e Maqedonisë së Veriut.
“I nderuar nga pritja e ngrohtë e një miku të vjetër, Presidentit të Maqedonisë së Veriut, Sh.T.Z Stevo Pendarovski.
Vlerësuam potencialin e madh që ekziston, për thellimin e marrëdhënieve shumë të mira fqinjësore mes vendeve tona, në të gjitha fushat, për një të ardhme më të shkëlqyer.
Kontribut të rëndësishëm në këtë drejtim, japin nismat rajonale gjithëpërfshirëse, si Procesi i Berlinit.
Në kuadër të aspiratave për anëtarësim në Bashkimin Europian, ndamë bindjen mbi nevojën e zhbllokimit të procesit dhe fillimit të shpejtë të negociatave të anëtarësimit në Bashkimin Europian, që do të ketë një kontribut pozitiv në prosperitetin e përgjithshëm, konsolidimin e paqes, stabilitetit dhe sigurisë në rajon.
Shqiptarët në Maqedoninë e Veriut në këto dekadat e fundit kanë qenë jo vetëm të përkushtuar për stabilitetin e vendit, por edhe garantë të integrimit euroatlantik të saj, ndaj dhe respektimi i të gjitha lirive dhe të drejtave të tyre, sipas standardeve më të avancuara europiane, është thelbësor.“, ka shkruar Meta pas takimit me Pendarovskin.
Siç njoftuan nga Kabineti i presidentit, takimi do të mbahet në zyrën e kreut të shtetit.
Presidenti Meta ndodhet për një vizitë pune në vend me ftesë të Institutit të Trashëgimisë Shpirtërore dhe Kulturore të Shqiptarëve. Siç njoftojnë nga ky institucion publik kombëtar, Meta në Shkup, në ambientet e Institutit, sot duhet të mbajë ligjëratën me temën “Shqiptarët në mijëvjeçarin e ri – sfidat dhe perspektivat”.
Presidenti i Shqipërisë së bashku me delegacionin e Departamentit të trashëgimisë së Gonxha Bojaxhiut – Nënë Tereza pranë Institutin, do të vendosin lule në memorialin – ku ishte vendosur shtëpia e Gonxha Bojaxhiut në sheshin në Shkup.
Nga Ministria e Punëve të Brendshme bëjnë me dije se për shkak të vizitës së presidentit Meta, gjatë tre ditëve të qëndrimit të tij, do të merren masa për regjim të posaçëm të qarkullimit në rrugët në zonën e gjerë qendrore të Shkupit.
SPB Shkup apelon tek të gjithë qytetarët pjesëmarrës në komunikacion që t’i binden urdhrave të policëve të uniformuar.